«QazAzot» zaýytyndaǵy tótenshe oqıǵadan zardap shekken 2 adam jansaqtaý bóliminde jatyr

AQTAÝ. KAZINFORM – Mańǵystaý oblystyq ákimdigi baspasóz qyzmetiniń habarlaýynsha, tótenshe oqıǵa 18-shilde kúni saǵat 14.47 shamasynda bolǵan. 

Oqıǵa ornynda 4 adam zardap shegip, barlyǵyna «termııalyq kúıik» dıagnozy qoıylǵan. Eki adam jansaqtaý bólimine, qalǵany travmotologııalyq bólimge jatqyzyldy.

– Zardap shekkenderge kómek kórsetý úshin QR bas reanımatology men kúıik jaraqattary boıynsha jetekshi mamandar shaqyrtyldy. Búginde zardap shekken jumysshylardyń jaǵdaıy birqalypty. Barlyq qajetti kómek kórsetilýde. Jaǵdaı oblys basshylyǵynyń baqylaýynda, - delingen habarlamada.

Mańǵystaý oblystyq memlekettik eńbek ınspektsııasy departamentiniń málimetinshe, kásiporyn jumysshylary otpen jumys isteý jumystaryn tıisti ruqsat qujattaryn rásimdemeı oryndalǵan.

– Oqıǵa jabyq keńistikte otpen jumys júrgizý kezinde bolǵan. Eńbek qaýipsizdigi talaptarynyń saqtalmaýy oqıǵaǵa sebep bolýy múmkin. Anyqtaý maqsatynda arnaıy komıssııa quryldy, - delingen eńbek ınspektsııasy departamentiniń resmı habarlamasynda.

Atalǵan oqıǵa boıynsha QR Qylmystyq kodeksiniń 156-baby – «Eńbekti qorǵaý qaǵıdalaryn buzý» boıynsha qylmystyq is qozǵaldy.

Mańǵystaý oblysy ákimi baspasóz qyzmetiniń habarlaýynsha, kompanııa tarapynan zardap shekken jumysshylardyń otbasylaryna qajetti kómek kórsetiledi. Bul shara da ákimdiktiń baqylaýynda bolady.

Buǵan deıin Mańǵystaýda «KazAzot» zaýytyndaǵy oqys oqıǵadan jumysshylar zardap shekkenin  jazǵan edik.