«QazAzot» kásipornynda tseh shatyry opyrylyp tústi

AQTAÝ. QazAqparat - Aqtaýda «QazAzot» kásipornyndaǵy kúrdeli mıneraldy tyńaıtqyshtar óndirý tsehynyń shatyry ortasyna opyrylyp qulady. Bul týraly kásiporynnyń baspasóz qyzmetinen málim etti, dep habarlaıdy QazAqparat tilshisi.

«Oqıǵa 24 shilde kúni saǵat 05:20 shamasynda boldy. Ǵımarat shatyrynyń ishinara opyrylýy qolaısyz meteojaǵdaılar saldarynan oryn alǵan. Óıtkeni sońǵy eki aptada óńirde anomaldy temperatýra boldy. Sondaı-aq oqıǵa bolǵan kúni naızaǵaı oınap, nóser jaýyn jaýǵan edi.

Tehnologııalyq jabdyqtar zardap shekken joq. Oqıǵa ornyn «Jalyn» Órt sóndirýshi» JShS-nyń avarııalyq-qutqarý qyzmeti tekserdi. Aımaq qorshaldy. Kásiporyn qyzmetkerleri men halyqtyń densaýlyǵyna qaýip joq», - delingen aqparatta.

Oqıǵa oryn alǵan aımaq tolyqtaı qorshalǵan. Qaza tapqandar men zardap shekkender joq.

Foto: www.lada.kz