«QazAzot» AQ-ǵa 1,7 mln teńgeden astam aıyppul salyndy
AQTAÝ. QazAqparat – Oblystyq ekologııa departamenti «QazAzot» AQ qorshaǵan ortaǵa 13 837 169 teńge kóleminde shyǵyn keltirdi dep sanaıdy. Sot sheshimimen mekemege 1 742 029 teńge ákimshilik aıyppul salyndy, dep habarlaıdy QazAqparat tilshisi.
Bul týraly MO Ekologııa departamentiniń basshysy Rýslan Tókenov málimdedi. Onyń aıtýynsha, QOS-1 jáne Qoshqar ata qaldyq kólin qosatyn sý arnasynan jaǵymsyz ıis shyǵyp, turǵyndar ekologııa departamentine shaǵym túsirgen. Atalǵan kanal qalanyń tómengi bóliginen tazartylǵan kárizdik sýdy aǵyzýǵa arnalǵan. Maýsym aıynan bastap mamandar zerthanalyq tekserýler júrgizgen. Tıisti synamalar alǵan. Nátıjesinde ammıaktyń shekti ruqsat etilgen kontsentratsııasynan edáýir asyp túskeni kórsetilgen. Aýadan da osyndaı hımııalyq ıis taralǵan. Anyqtaı kele, kanalǵa basqa qubyrdan sarqyndy sý tógilgeni belgili boldy.
«Aǵyndy sýdyń qaıdan quıylǵanyn anyqtaý úshin, kólemi 20 ga jer bederi 0,5 m-den keıin TS-407 elektrondy taheometriniń kómegimen kóldeneń qımasymen M 1:500 topografııalyq túsirilim júrgizildi, al ınjenerlik kommýnıkatsııalar jer asty qubyr jáne kabelderdi anyqtaıtyn rd-4000 izdeýshi quraly arqyly tekserildi. Nátıjesinde sarqyndy sýlar tógilgen qubyr »QazAzot«AQ-ǵa jatatyny anyqtaldy (jobaǵa sáıkes qubyr tek qana jer asty sýlaryn aǵyzýǵa arnalǵan)»,-deıdi Rýslan Tókenov.
Osyǵan baılanysty, ekologııa departamenti «QazAzot»AQ-ǵa qatysty jospardan tys tekserý júrgizgen. Belgilengen tekserý nátıjeleri boıynsha óndiristik-sarqyndy sýlar aǵyzylǵan.
«Departamentpen Qazaqstan Respýblıkasynyń Ákimshilik quqyq buzýshylyq týraly kodeksiniń 324, 325, 328 jáne 332-baptary boıynsha 4 ákimshilik is qozǵalyp, osy ekologııalyq quqyq buzýshylyqtar sot sheshimderimen dáleldendi. Sot organymen jalpy somasy 1 742 029 teńgege ákimshilik jaza qoldanyldy, al ekologııa departamenti usynǵan jalpy shyǵyn somasy 13 837 169 teńgeni qurady. Qazirgi ýaqytta Departament óndiristik sarqyndy sýlardy aǵyzýdy, tıisinshe osy óndiristik sarqyndy sýlar tógilgen jalǵanǵan qubyrdy bólshekteý týraly sotqa talap aryz daıyndaıdy»,-deıdi sala basshysy.