«QazAvtoJoldyń» Túrkistan oblysyndaǵy fılıal dırektory jumysynan ketti

NUR-SULTAN. QazAqparat – Jol sapasyna qatysty turǵyndardyń shaǵymynan keıin «QazAvtoJol» UK» AQ Túrkistan oblystyq fılıalynyń dırektory jumysynan bosatyldy. Bul týraly QR Indýstrııa jáne ınfraqurylymdyq damý mınıstrligi Avtomobıl joldary komıtetinen málim etti, dep habarlaıdy QazAqparat.

«El turǵyndarynan bolǵan synǵa baılanysty «QazAvtoJol» UK» AQ Túrkistan oblystyq fılıalynyń dırektoryn qyzmetinen bosatý týraly sheshim qabyldandy. Qoǵam tóraǵasynyń orynbasaryna qatań sógis jarııalandy.

Sonymen qatar joldardy kútip ustaý sapasyn tıisinshe baqylamaǵany úshin «Jol aktıvteriniń ulttyq sapa ortalyǵy» sharýashylyq júrgizý quqyǵyndaǵy» respýblıkalyq memlekettik kásipornynyń óńirlik fılıal basshysyna qatysty tártiptik sıpattaǵy sharalar qabyldandy», - delingen usynylǵan habarlamada.

Málim etilgendeı, qazirgi ýaqytta beton plıtalarynyń kóterilýin toqtatý boıynsha sharalar qabyldandy. Sondaı-aq mıkrosıýrfeısıng tóseý jumystaryn ýaqytsha toqtatý sheshimi qabyldandy. Budan bólek, tsement-beton plıtalarynyń arasyn keńeıtetin temperatýralyq tigister kúndelikti tekseriletin boldy.

«Aıta ketý kerek, atalǵan másele QR IIDM Avtomobıl joldary komıtetiniń erekshe baqylaýynda. Plıtalardyń ózgergen oryndarynda taldaý júrgizildi. Sonyń negizinde tıisti buıryqtar berildi. Bul is-sharalardyń basty maqsaty – mundaı faktilerdiń qaıtalanýyna jol bermeý», - delingen mınıstrliktiń baspasóz málimetinde.

Eske salaıyq, bıylǵy 8 maýsymda «Samara – Shymkent» tasjolynyń «Qyzylorda – Shymkent» aqyly ýchaskesinde tsement-beton plıtasy kóterilip ketken bolatyn. Jol ortasyndaǵy úlken plıtalar ajyrap, kólikterdiń júrýine kedergi týdyrdy.

Keıin, respýblıkalyq mańyzy bar M-32 «Samara-Shymkent» avtojolynyń Túrkistan qalasy Temirlan aýdany mańyndaǵy bóliginde tsement-beton plıtasy taǵy kóterildi.