«QazAvtoJoldyń» burynǵy basshysy jemqorlyq daýymen ketken joq – Kólik mınıstri
Kólik mınıstri Marat Qarabaev Úkimet otyrysynan keıin ótken brıfıngide «QazAvtoJoldyń» burynǵy basshysynyń qyzmettten ketýine qatysty túsinik berdi, dep habarlaıdy Kazinform.
«Taıaýda «QazAvtoJoldyń» basshysy bolǵan Meıirhat Qasymbaev qyzmetinen ketti. BAQ onyń jemqorlyq daýyna ushyraǵan Qalbataý - Maıqapshaǵaı jolyn jóndegen «QazGerStroı» kompanııasyna qatysy bar ekenin jazdy. Bas prokýratýra osy joldyń qurylysyna dep bólingen 21 mlrd teńgeniń maqsatqa saı jumsalmaǵanyn habarlady. Onyń qyzmetinen ketýine sol jemqorlyq daýy sebep boldy ma?», – dep surady jýrnalıst.
«Joq. «QazAvtoJoldyń» burynǵy basshysynyń qyzmetinen ketýi odan emes. Ol óz erkimen jumystan bosady», – dedi Marat Qarabaev.
Sondaı-aq tilshi atalmysh jol qurylysyna Qytaıdyń «Eksımbankinen» qansha qaryz alynǵanyn surady.
«Qalbataý - Maıqapshaǵaı jolyna sheteldik qarjy ınstıtýtynan kredıt tartylǵan. Joldyń jalpy qurylysy sol kózden qarjylandyrylyp jatyr. Túrli-túrli kózder qarastyrylǵan. Birneshe ýchaskege, birneshe lotqa bólinedi. Eń basym baǵyttaǵy aqsha qytaılyq «Eksımbankke» tıesili. Onyń kólemi – 156 mlrd teńge», – dedi vedomstvo basshysy.
