«QazAvtojolda» Jambyl oblysyndaǵy magıstral qurylysy jaıly aıtyldy

TARAZ. QazAqparat - Batys Eýropa - Batys Qytaı halyqaralyq tranzıttik dálizi avtojolynyń Jambyl oblysyndaǵy bóliginiń qurylysyna kóbine otandyq óndiristiń qurylys materıaldary qoldanyldy, dep habarlaıdy «QazAqparat» HAA tilshisi «QazAvtojol» UQ» AQ Jambyl oblysyndaǵy fılıalyna silteme jasap.

«QazAvtojol» ulttyq kompanııasy fılıalynyń basshysy Dáýren Toqtarovtyń málimdeýinshe, qazirgi ýaqytta Batys Eýropa - Batys Qytaı kúre jolynyń Jambyl oblysyndaǵy bóliginiń 495 km salynyp bitti, onyń 295-i tórt jolaqty, 200 km ekinshi dárejeli tehnıkalyq, ıaǵnı eki jolaqty. 351 km tas jol tsement-beton,  144 km - asfaltty-beton jabyndysymen salynyp, 13 tonnalyq júkke eseptelgen. Jol qurylysshylary mundaı jol  20-25 jyl qyzmet etetindigin aıtady.

Batys Eýropa - Batys Qytaı magıstraliniń qurylysy jeti myń jambyldyqtardy jumyspen qamtyp otyr.  

Qazirgi ýaqytta halyqaralyq magıstral boıymen Jambyl arqyly táýligine orta eseppen 7,5 myńnan astam kólik júrip ótedi.

Jambyl oblysyndaǵy respýblıkalyq mańyzǵa ıe joldyń jalpy uzyndyǵy 1 237 km quraıdy, ony kútip ustaý jumystaryn «Kazahavtodor» RMK Jambyl oblysyndaǵy fılıaly júzege asyrady.