QazAvtoJol júrgizýshilerge úndeý jasady

ASTANA. KAZINFORM — Jolaýshylardy tasymaldaý kezinde júrgizýshilerdiń mobıldi qurylǵylarǵa alańdaýy jol qaýipsizdigine úlken qater tóndirip otyr. Sońǵy oqıǵalar tártipti kúsheıtip, jolaýshylardyń ómirin qorǵaý úshin qaýipsizdik talaptaryn qatań saqtaýdyń qajettigin taǵy bir márte dáleldedi. QazAvtoJol kompanııasy qaýipsizdik erejelerin eske salyp, júrgizýshilerge úndeý jasady.  

— Jaqynda Astana–Pavlodar baǵyty boıynsha bolǵan jaǵdaı birqatar júrgizýshiniń birneshe servıske tirkelip, qozǵalys kezinde habarlama jazýǵa, qosymsha tapsyrys qaraýǵa, áleýmettik jeliler men beınematerıaldarǵa nazar aýdarýǵa áýestigi bar ekenin kórsetti. Mundaı áreketter kólik júrgizýge kedergi keltirip qana qoımaı, jolaýshynyń ómirine tikeleı qaýip tóndiredi. Bul — jol qozǵalysy qaýipsizdigi jónindegi zań talaptaryn óreskel buzý, — delingen habarlamada.

Osyǵan baılanysty tómendegi qaǵıdalardy qatań este saqtaýǵa shaqyrdy: 

1. Kólik júrgizý kezinde telefon qoldanýǵa tyıym salynady. Tek daýys zoraıtqysh arqyly sóılesý nemese joldan alańdatpaıtyn navıgatsııalyq júıelerdi paıdalaný ruqsat etiledi.

2. Birneshe servıste qatar jumys isteý kólik basqarý protsesine kedergi keltirmeýi tıis.

3. Jolaýshy eskertý jasaǵan jaǵdaıda ony qurmetpen qabyldap, qaýipsizdikke nuqsan keltiretin áreketterdi dereý toqtatý qajet.

4. Qaǵıdalardy buzý aıyppul salýǵa, servısten shettetilýge, sondaı-aq zańnamaǵa sáıkes jaýapkershilikke ákep soǵady.

5. Árbir reıste basty nazar — jolaýshynyń qaýipsizdigi men kólikti apatsyz basqarý.

Jolaýshy amandyǵy — barshamyzǵa ortaq jaýapkershilik. Sapaly qyzmet kórsetý, kásibı tártip pen uqyptylyq — sizdiń abyroıyńyz ben salanyń bedelin arttyratyn negizgi ólshemder.

Qaýipsizdik talaptaryn saqtaı otyryp, jolaýshylarǵa senimdi, jaıly ári qaýipsiz qyzmet kórseteıik.

Eske sala keteıik, buǵan deıin Batys Qazaqstanda jol apatynan 8 adam kóz jumǵanyn jazǵan edik.