«QazAvtoJol» júk kóliginiń salmaǵyn ólsheýden jaltarǵandarǵa jaýapkershilik engizýdi usyndy
ASTANA. KAZINFORM — Respýblıkalyq joldarda júk kóliginiń salmaǵyn ólsheýden jaltarǵandarǵa jaýapkershilik engizý qajet. Bul týraly búgin Úkimet otyrysynda «QazAvtoJol» kompanııasynyń basqarma tóraǵasy Darhan Imanashev aıtty.
— Artyq júk tasymalyn azaıtyp, joldardyń merziminen buryn buzylýyna jol bermeý úshin respýblıkalyq joldarda 46 avtomattandyrylǵan ólsheý stantsııasy ornatylǵan. Stantsııalar kóliktiń salmaq-gabarıttik parametrlerin avtomatty túrde tirkep, derekti tıisti shara qabyldaý úshin ókiletti organnyń aqparattyq júıesine jiberedi. Sonymen qatar salmaq baqylaýynan qashý jaǵdaılary kezdesedi. Jekelegen júrgizýshiler stantsııalardy ruqsatsyz kirme, shyǵý joldary arqyly aınalyp ótedi nemese kólikti durys tirkeýge kedergi keltiretin basqa da áreketterdi jasaıdy. Qazirgi ýaqytta respýblıkalyq joldardaǵy zańsyz kirme jáne shyǵý joldar túgel tekserilip, kezeń-kezeńimen jabylyp jatyr, — dedi kompanııa basshysy.
Osy rette ol Premer-mınıstr Oljas Bektenovten júk kóligin ólsheýden jaltarǵandarǵa jaýapkershilik engizý usynysyna qoldaý bildirýdi surady.
— Oljas Abaıuly, ózińiz qoldaǵan jaǵdaıda avtomattandyrylǵan salmaq-gabarıttik baqylaýdan ádeıi jasyrǵany úshin naqty jaýapkershilik belgileý jónindegi zańnamalyq ózgeristerdi pysyqtaýdy usynamyz. Sondaı-aq mundaı quqyq buzýǵany úshin kásipkerlik sýbektileriniń jaýapkershiligin bir izge túsirýdi usynamyz, — dedi Darhan Imanashev.
Aıta keteıik, otyrysta jol qozǵalysy qaýipsizdigin qamtamasyz etý máselesi qaralyp, jylý berý maýsymyna daıyndyq barysy pysyqtalyp jatyr.
