«QazAvtoJol» joldyń taıǵaqtyǵyna shaǵymdanǵan júrgizýshilerge jaýap berdi
TALDYQORǴAN. KAZINFORM — Jetisý oblysynda júrgizýshiler joldarǵa ýaqytyly qum sebilmegendikten qozǵalystyń qıyndaǵanyn aıtyp, shaǵymdanyp otyr. Jolǵa jaýapty mamandar bul másele boıynsha túsinikteme berdi.
Kúndiz áleýmettik jelide Jetisý oblysyna qarasty Saryózek–Taldyqorǵan baǵytyndaǵy Muqyry asýy jolyna qum sebilmegeni týraly jolaýshylardyń shaǵymy jarııalanǵan bolatyn. Jazba avtory kók muzǵa aınalǵan kúre jolǵa ne qum, ne tuz tógilmegenin aıtyp, aqyly jolda jolaýshylardy saq bolýǵa shaqyrdy.
«QazAvtoJol» UK-nyń Jetisý oblysy boıynsha fılıaly ókilderi jaýap berdi:
— Beınematerıal tańerteń túsirilgen. Saǵat 15.00-ge qaraı muzǵa qarsy materıaldy tógý kúsheıtildi. Joldardy qardan tazartýdyń belgili bir ýaqyty bar, ol kezde qozǵalys qarqyndylyǵy men ekstremaldy aýa raıy jaǵdaılary eskeriledi. Jalpy, «Saryózek–Taldyqorǵan» tas jolynyń bóligin qardan tazartý úshin 13 birlik tehnıka jumyldyrylyp, 200 tekshe metrden astam muzǵa qarsy materıal paıdalanyldy, — dedi «QazAvtoJol» ókilderi.
Úsharal–Taldyqorǵan baǵyty boıynsha da jolǵa shyqqan jolaýshylar Qyzylaǵash–Taldyqorǵan, Qabanbaı–Kólbaı aýyldary aralyǵyndaǵy kóktaıǵaq saldarynan kólikterdiń bir- birine soǵylyp, júk kólikteriniń aýdarylyp jatqanyn aıtyp shaǵymdanǵan.
— Sumdyq. Joldyń ortasynda kóldeneńnen fýralar qulaǵan. Kólbaı men eki orta qaýipti bolyp tur. Jolǵa shyǵamyn degender shyqpaı-aq qoısyn, — delingen jazbada.
Kúndiz jazylǵan shaǵymdarǵa jaýapty mamandar arada 3 saǵat ótkennen keıin ǵana ún qatty.
«QazAvtoJol» Jetisý oblysy fılıalynyń paıdalaný jáne qozǵalys qaýipsizdigi bóliminiń bas mamany:
— Respýblıkalyq mańyzy bar Almaty – Óskemen avtojolynyń 124–209 shaqyrym aralyǵy. Joldyń betki qabaty taza, ashyq. Eshqandaı kóktaıǵaq baıqalmady. Jol patrýldik jumystary jalǵasýda, — dep habarlady.
Eske salaıyq, buǵan deıin Almaty men Jetisý oblysyndaǵy birqatar baǵyttaǵy joldardyń ashylǵany týraly jazǵanbyz.