QazAvtoJol joldardaǵy jańa «aqyldy» kameralardyń ne úshin ornatylyp jatqanyn túsindirdi
ASTANA. KAZINFORM — Keıingi kúnderi áleýmettik jelilerde júrgizýshiler avtojol boılarynda paıda bolǵan belgisiz qurylǵylardyń sýretterin jarııalap, olardyń maqsatyna qatysty suraqtar qoıǵan edi. QazAvtoJol ulttyq kompanııasy bul qurylǵylardyń jasandy ıntellekt elementteri bar jańa beıneanalıtıka júıesi ekenin túsindirdi.
Kompanııanyń málimetinshe, jańa júıe respýblıkalyq avtojoldardaǵy jaǵdaıdy táýlik boıy baqylap, joldaǵy qaýipti jaǵdaılardy jedel anyqtaýǵa múmkindik beredi.
— Qurylǵylardyń basty ereksheligi — avtonomdy jumys isteý múmkindigi. Olar shalǵaı jol ýchaskelerinde de qyzmet atqara alady. Ol úshin kameralar kún panelderimen jáne jel generatorlarymen jabdyqtalǵan. Qurylǵylar alynǵan derekterdi naqty ýaqyt rejıminde tıisti qyzmetterge jiberedi, — dep habarlady kompanııa.
Jasandy ıntellekt júıesi joldaǵy birqatar qaýipterdi anyqtaı alady. Atap aıtqanda, jol bóligine jaıaý júrginshiniń nemese janýardyń shyǵýyn, qarsy baǵytqa ótý, keri júrý, turaq erejesin buzý sııaqty jaǵdaılardy tirkeıdi. Sondaı-aq kóliktiń memlekettik nómirin, markasyn jáne túsin taný múmkindigi bar.
QazAvtoJol bul jobanyń negizgi maqsaty — jol qozǵalysy qaýipsizdigin arttyrý ekenin atap ótti. Qaýipti jaǵdaılar erte anyqtalǵan jaǵdaıda, jol qyzmetteri oǵan jedel áreket ete alady.
— Qazirgi ýaqytta pılottyq joba «Almaty — Qonaev» aqyly avtojol ýchaskesinde synaqtan ótip jatyr. Sonymen qatar uzyndyǵy 134 shaqyrym bolatyn «Astana — Temirtaý» baǵytynda da jumystar júrgizilýde. Bul ýchaskede kameralar, kún panelderi, jel generatorlary jáne derekterdi berý jabdyqtaryn ornatýǵa daıyndyq jasalyp jatyr, — delingen habarlamada.
Budan bólek, «Astana — Şýchınsk» avtojolynda da qajetti ınfraqurylymdy daıyndaý jumystary bastalǵan.
Aldaǵy ýaqytta mundaı qurylǵylar respýblıkalyq mańyzy bar avtojoldardy baqylaýdyń biryńǵaı ıntellektýaldy júıesiniń bir bóligine aınalady. Ol joldaǵy qaýipterdi avtomatty túrde anyqtap, jol qyzmetteriniń áreket etý jyldamdyǵyn arttyrýǵa múmkindik beredi.
Eske salaıyq, buǵan deıin Astanadaǵy kameralar 40 myńnan astam quqyqbuzýshylyqty anyqtaǵanyn habarlaǵanbyz.
