«QazAvtoJol» Jambyl oblystyq fılıaly basshysynyń orynbasary sottaldy — Antıkor

ASTANA.KAZINFORM — 296 mln teńgeni rásýa qylǵany úshin «QazAvtoJol» Jambyl oblystyq fılıaly basshysynyń orynbasary sottaldy. Bul týraly Antıkor málim etti. 

26 jeltoqsanda Qordaı aýdandyq sotymen «QazAvtoJol» Jambyl oblystyq fılıaly basshysynyń orynbasary D. Týltaev, «DorStroı» JShS merdigerlik uıymy jobasynyń jetekshisi Ý. Qurbanov jáne «Almaty Sapa Injınırıng» JShS tehnıkalyq qadaǵalaý sarapshysy D. Musaqul sottaldy.

— Olar qazaq-qyrǵyz shekarasyndaǵy «Qordaı» ótkizý pýnktin salý, keńeıtý jáne rekonstrýktsııalaý kezinde 296 mln teńgeden astam bıýdjet qarajatyn ysyrap etkeni úshin kináli dep tanyldy. Qarjy jymqyrý, oryndalmaǵan jumys aktilerine qol qoıý, sol jumys túrlerine eki ese aqy tóleý, jabdyqtyń qunyn asyra baǵalaý sondaı-aq zattardy az mólsherde jetkizý arqyly jasalǵan, — delingen agenttik habarlamasynda. 

Týltaev pen Qurbanovqa tıisinshe 10 jyl merzimge jol-qurylys jumystarymen jáne qurylys jumystary salasyndaǵy kásipkerlik qyzmetpen aınalysý quqyǵynan aıyra otyryp, árqaısysyna 8 jyl bas bostandyǵynan aıyrý jazasy taǵaıyndaldy.

Sol úkimmen Musaqul sáýlet, qala qurylysy jáne qurylys qyzmeti salasynda 10 jyl merzimge ınjınırıngtik qyzmetter kórsetýmen aınalysý quqyǵynan aıyra otyryp, 7 jylǵa bas bostandyǵynan aıyryldy.

Sot aktisi zańdy kúshine engen joq.

Eske sala keteıik, buǵan deıin Eńbek mınıstrliginiń sheneýnigi balanyń múgedektigin bekitkeni úshin para alǵanyn jazǵan bolatynbyz.