«QazAvtoJol» ulttyq kompanııasynda kadrlyq aýys-túıister oryn aldy

ASTANA. QazAqparat - Ýákiletti memlekettik organ - QR Investıtsııalar jáne damý mınıstrliginiń jáne jalǵyz aktsıoner - «Qazaqstan temir joly» UK» AO kelisimimen, «QazAvtoJol» UK» AQ basqarma tóraǵasynyń buıryǵymen birqatar taǵaıyndaýlar júrgizildi.

Kompanııa saıtynda jarııalanǵan aqparatqa súıensek, «QazAvtoJol» UK» AQ basqarma tóraǵasynyń orynbasary bolyp Berik Jeldikbaev taǵaıyndaldy.

Bul qyzmetke deıin B.Jeldikbaev «QazAvtoJol» Aqmola oblystyq fılıalynyń dırektory bolyp eńbek etken. Odan buryn kompanııanyń Jambyl oblystyq fılıalynda jumys istegen. B.Jeldikbaevtiń quziretine respýblıkalyq mańyzy bar avtokólik joldarynyń paıdalanylý máseleleri: kúrdeli jáne ortasha jóndeý, avtojoldy ustap turý enetin bolady.

Sonymen birge, «QazAvtoJol» Mańǵystaý  oblystyq fılıalynyń dırektory bolǵan Nurlanbek Ómirbaev kompanııanyń bas ınjeneri bolyp taǵaıyndaldy. N.Ómirbaev qurylys sapasyn baqylaý jáne avtokólik joldaryn qaıta jańartý, jobalyq-smetalyq qujattardy daıyndaý máselelerine jetekshilik etedi.

Respýblıkalyq mańyzy bar avtokólik joldaryn qaıta jańartý jumystarymen aınalysatyn jelini damytý deparatmentiniń basshysy da ózgerdi. Bul mindet Erlan Qalymovqa berildi. E.Qalymov buǵan deıin «QazAvtoJol» UK» AQ kúrdeli qurylys basqarmasynyń basshysy bolǵan.