«QazAvtoJol» tsementbeton plıtalaryndaǵy deformatsııa qaýpi bar 31 ýchaskeni anyqtady
ASTANA. KAZINFORM – «Almaty – Shelek – Qorǵas» avtojolynda tsementbeton jabyndysyna júrgiziletin profılaktıkalyq jumystar kúsheıtildi.
Aýa temperatýrasynyń joǵarylaýyna baılanysty «QazAvtoJol» ulttyq kompanııasynyń jol qyzmetteri respýblıkalyq mańyzy bar «Almaty – Shelek – Qorǵas» avtomobıl jolyndaǵy tsementbeton jabynynyń jaı-kúıine monıtorıng júrgizýdi kúsheıtti.
Júrgizilgen tekserý barysynda jol qyzmetteriniń mamandary jaýapty uıymdarmen birlesip tsementbeton jabyndysy bar ýchaskelerdi tolyq zerdeledi. Monıtorıng qorytyndysy boıynsha tsementbeton plıtalarynda temperatýralyq deformatsııalardyń paıda bolý qaýpi bar 31 ýchaske anyqtaldy.
Aqaýlardyń aldyn alý maqsatynda jol mamandary jedel túrde profılaktıkalyq sharalardy qolǵa aldy. Qazirgi ýaqytta 21 ýchaskede joǵary temperatýra áserinen beton plıtalarynda paıda bolatyn ishki kerneýdi tómendetýge arnalǵan qosymsha deformatsııalyq jikter kesilip, qajetti jumystar tolyq oryndaldy. Qalǵan 10 ýchaskede profılaktıkalyq jumystar jalǵasýda jáne mamandardyń turaqty baqylaýynda tur.
Sonymen qatar áleýmettik jelilerde tsementbeton jabynynyń jergilikti aqaýy túsirilgen beınematerıal taralýda. Aldyn ala málimetter boıynsha, atalǵan jaǵdaı aýyr júk kóliginiń ótýinen keıin bolǵan. Kólik júktemesiniń áserinen beton jabynynyń bir bóligi buzylyp, keıinnen osy ýchaskemen ótken jeńil avtokólikterdiń dóńgelekterine zaqym kelgen.
Oqıǵadan keıin jol qyzmetteri merdiger uıymmen birlesip saldardy joıý boıynsha jedel sharalar qabyldady. Atalǵan ýchaske qysqa merzimde normatıvtik jaǵdaıǵa keltirilip, qazirgi ýaqytta kólik qozǵalysy shtattyq rejımde júzege asyrylýda.
Zardap shekken kólik ıelerine keltirilgen materıaldyq shyǵyn merdiger uıym tarapynan tolyq kólemde óteldi. Sonymen qatar atalǵan fakti boıynsha merdiger uıymǵa qatysty polıtsııa organdary ákimshilik yqpal etý sharalaryn qoldanyp, tıisti aıyppul saldy.
Aıta ketelik «QazAvtoJol» respýblıkalyq joldarǵa qatysty 12 myńnan astam ótinimdi óńdegen edi.
