QazAvtoJol sý basqan óńirlerge tehnıkalaryn jiberip jatyr

ASTANA. KAZINFORM – QazAvtoJol sý basqan óńirlerge tehnıkalaryn jiberip jatyr. Bul týraly atalǵan kompanııanyń resmı ókili Sáken Dildahmet aıtty. 

«Qazirgi tańda respýblıkalyq joldarda 450 birlik tehnıka men 853 adam sý tasqynyn aldyn alý úshin jumys istep jatyr. «QazAvtoJol» ulttyq kompanııasy sý tasqynyna qarsy sharalarǵa belsendi qatysyp, aımaqtarǵa tabıǵı apattarmen kúresýge kómek kórsetýde. Kompanııa jergilikti atqarýshy organdardyń ótinimderi boıynsha Batys Qazaqstan jáne Atyraý oblystaryna qosymsha arnaıy tehnıkalardy jumyldyrdy», - dedi Sáken Dildahmet Ortalyq kommýnıkatsııalar qyzmetindegi brıfıngte.

Onyń atap ótýinshe, qazirgi tańda Batys Qazaqstan oblysynyń Bórli jáne Terekti aýdandaryna 33 birlik tehnıka jiberildi. Sonymen qatar, rezervte kez kelgen ýaqytta qoldaý kórsetýge qosymsha 74 birlik tehnıka daıyn tur.

«Atyraý oblysynyń Atyraý, Qulsary qalalarynda jáne Mahambet, Hamıt Erǵalıev pen Damby eldi mekenderinde 138 birlik tehnıka sý tasqynyna qarsy kúresip jatyr. Sondaı-aq, tabıǵı apatty aldyn alýǵa basqa oblystardan Atyraý oblysyna qosymsha 64 birlik tehnıka mobılızatsııalandy. Sý tasqynyna qarsy sharalar aıasynda Qazaqstannyń basqa óńirlerine, onyń ishinde Aqtóbe, Aqmola, Qostanaı, Soltústik Qazaqstan jáne Pavlodar oblystaryna qosymsha kómek jiberildi. Jalpy 2 106 birlik jol-qurylys tehnıkasy, 24 motopompa men 2 826 jumysshy jumyldyryldy», - dedi ol.