QazAvtoJol: shamadan tys júk Taldyqorǵan – Óskemen jolyn búldirip jatyr
ASTANA. KAZINFORM – «Qazavtojol» karer ıelerin, júk tasymaldaýshylardy jáne aýyr júk kólikterin paıdalanatyn uıymdardy baqylaýdan aınalyp ótýdiń jolyn izdemeı, belgilengen salmaq pen ostik júkteme normalaryn saqtaýǵa shaqyrdy.
Bul týraly mekeme óziniń Telegram paraqshasynda jazddy.
— Birneshe kún buryn Abaı oblysyndaǵy jańadan jańǵyrtylǵan Taldyqorǵan — Óskemen avtomobıl jolyna túsip otyrǵan shamadan tys júkteme týraly jazǵan edik. Endi sol joldyń jaı-kúıine tikeleı qaýip tóndirip otyrǵan jaǵdaıdy naqty beınejazba arqyly kórsetip otyrmyz. Kadrlarda karerden qurylys materıaldaryn tıep shyqqan aýyr júk kólikteri kórinedi. Avtomattandyrylǵan ólsheý stantsııasyna (AÓS) jaqyndaǵan sátte júrgizýshiler negizgi joldan shyǵyp, jol jıegi arqyly salmaq baqylaý júıesin aınalyp ótedi.
Bul kólikterdiń salmaǵy belgilengen normadan asyp otyr. Al shamadan tys júk — asfalttyń eń úlken jaýlarynyń biri. Artyq salmaq jol konstrýktsııasyna eseptik mólsherden joǵary kúsh túsirip, jamylǵynyń merziminen buryn tozýyna, oıyq izderdiń, jaryqtar men túrli deformatsııalardyń paıda bolýyna ákeledi.
Osy tusta zańdy saýal týyndaıdy: eger kóliktiń salmaǵy men ostik júktemesi talapqa saı bolsa, avtomattandyrylǵan ólsheý stantsııasyn aınalyp ótýdiń qajeti ne?
AÓS kóliktiń jalpy salmaǵy men oske túsetin júktemeni avtomatty túrde ólsheıdi. Bul — kásipke kedergi keltiretin qural da, júk tasymalyn shekteýdiń amaly da emes. Kerisinshe, memleket qarjysyna salynǵan joldardy merziminen buryn búlinýden qorǵaıtyn baqylaý tetigi.
Bul baǵyttaǵy shamadan tys júktemeniń saldaryn qazirdiń ózinde joıýǵa týra kelip otyr. Qysqa merzim ishinde 10 myń sharshy metrden astam asfaltbeton jamylǵysyn qalpyna keltirý qajettiligi týyndady. Joldyń búlinýine yqpal etip otyrǵan negizgi faktorlardyń biri — belgilengen salmaq normalaryn saqtamaıtyn aýyr júk kólikteriniń qozǵalysy.
Máseleniń taǵy bir qyry bar. AÓS-ti aınalyp ótý úshin kóp tonnaly kólikter jol jıegine shyǵady. Al jol jıegi aýyr júk kólikteriniń turaqty qozǵalysyna arnalmaǵan. Sonyń saldarynan negizgi jol jamylǵysyna ǵana emes, joldyń ózge de konstrýktıvtik elementterine qosymsha salmaq túsedi.
Osyǵan baılanysty karer ıelerin, júk tasymaldaýshylardy jáne aýyr júk kólikterin paıdalanatyn uıymdardy baqylaýdan aınalyp ótýdiń jolyn izdemeı, belgilengen salmaq pen ostik júkteme normalaryn saqtaýǵa shaqyramyz.
— Elge jańa jol da, jańa ınfraqurylym da, turaqty jumys isteıtin bıznes te qajet. Alaıda bir salanyń damýy ekinshi ınfraqurylymnyń merziminen buryn buzylýy esebinen júzege aspaýǵa tıis. Ekonomıkalyq belsendilik pen joldyń saqtalýy bir-birine qarsy uǵym emes. Munda bar bolǵany ortaq talapty saqtaý qajet, -delingen habarlamada.
Osyǵan deıin QazAvtoJol aýyr júk kóligi júrgizýshilerine mańyzdy eskertý jasaǵan bolatyn.
