QazAvtoJol osy jyly qandaı joldardyń jóndeletinin málimdedi

ASTANA. KAZINFORM — «QazAvtoJol» 2024 jyly Aqtóbe – Ulǵaısyn jáne «Jezqazǵan – Qaraǵandy jańa jobalaryn iske asyrýdy josparlap otyr.

«QazAvtoJol» UK» AQ aǵymdaǵy jyly jalpy uzyndyǵy 96 km quraıtyn «Aqtóbe — Ulǵaısyn» jáne «Jezqazǵan — Qaraǵandy» atty eki jańa jobany iske asyrýdy josparlap otyr (40 km Jezqazǵan-Qaraǵandy jáne 56 km Aqtóbe-Ulǵaısyn).

«Qyzylorda — Pavlodar — Ýspenka — RF shekarasy» respýblıkalyq kúre jolynyń «Jezqazǵan — Qaraǵandy» ýchaskesin qaıta jańartý maqsatynda «Memsaraptama» RMK qorytyndysyn aldy.

Qurylys Ulytaý oblysynyń Jańaarqa jáne Qaraǵandy oblysynyń Shet aýdandarynda júrgiziledi. 755 km-den bastalyp, 795 km-ge deıin Aqtaılaq, Qaramola, Bıdaıyq kentteri arqyly ótedi. Merdigerlik uıymdy aıqyndaý boıynsha tenderlik qujattama daıyndalyp, ótinimderdi qabyldaý 22 qańtarda bastalady», — dep jazdy vedomstvodan.

«RF shekarasy (Samaraǵa) — Shymkent» respýblıkalyq avtomobıl jolyndaǵy «Aqtóbe — Qarabutaq — Ulǵaısyn» qaıta jańartý jobasynyń 791-819 km ýchaskesi boıynsha tender jarııalanyp, ótinimderdi ashý 2024 jylǵy 3 qańtarda ótken. Búgingi tańda «Sıne Mıdas Stroı» JShS merdiger retinde anyqtaldy.

Qurylys jumystary Aqtóbe oblysynyń Hromtaý aýdanynda júrgiziledi. Qaıta jańartý 791-819 km aýmaqta júrip, Aqjar kenti men Jazyq stantsııalary arqyly Hromtaý qalasyna qaraı jalǵasady.

«763-791 km ýchaskesindegi jumystarǵa „Memsaraptama“ RMK oń qorytyndysyn alý kútilýde, sońynan tender jarııalaý maqsatynda qujattama daıyndalady», — delingen aqparatta.

Qurylystyń normatıvtik merzimderi merdigerlermen shart jasasyp, ýchaskege jumyldyrylyp, qajetti ruqsat qujattamasy resimdelgennen keıin aıqyndalatyn bolady.