QazAvtoJol: Mototsıklderdiń kóbeıýi jolda muqııattylyqty talap etedi

ASTANA. KAZINFORM – Jazǵy maýsymda respýblıkalyq mańyzy bar avtomobıl joldarynda mototsıkl júrgizýshileriniń qatary aıtarlyqtaı artyp otyr, dep habarlaıdy QazAvtoJol.

Mamandardyń aıtýynsha, eki dóńgelekti kóliktiń kóbeıýi barlyq jol paıdalanýshylardan tártip pen saqtyqty talap etedi. Kólik júrgizýshileri úshin mototsıkldi birden baıqaý árqashan múmkin emes. Sondyqtan aınany jıi qadaǵalap, jolaq aýystyrǵanda nemese manevr jasaǵanda burylys shamyn aldyn ala jaǵý asa mańyzdy. Bul áreket mototsıklshilerdi der kezinde eskertip, yqtımal apattyń aldyn alýǵa kómektesedi.

Sonymen qatar, mototsıkl ıeleri de úlken jaýapkershilikke ıe. Olar jol qozǵalysy erejelerin, jyldamdyq shekteýlerin jáne jol belgilerin qatań saqtaýy qajet. Qaýipsizdik maqsatynda mindetti túrde qorǵanys dýlyǵasy men arnaıy kıimdi paıdalaný mańyzdy. Sarapshylardyń aıtýynsha, jol-kólik oqıǵasy kezinde mototsıkl júrgizýshisi avtokólik ıesine qaraǵanda áldeqaıda álsiz qorǵalǵan.

«Joldaǵy qaýipsizdik ár júrgizýshiniń ózine de, ózgege de qurmetpen qaraýynan bastalady. Ortaq jaýapkershilik – qaýipsiz sapardyń kepili», – delingen QazAvtoJol habarlamasynda.

Aıta keteıik, Almatyda elektrovelosıped ıelerine eskertý jasaldy.