«QazAvtoJol» merdiger uıymdardy alaıaqtyq áreketterden saq bolýǵa shaqyrdy
ASTANA. KAZINFORM — «QazAvtoJol» UK» AQ merdiger, qosalqy merdiger uıymdar men áleýetti jetkizýshilerdi úshinshi tulǵalar tarapynan jasalyp jatqan alaıaqtyq áreketter týraly eskertti.
Kompanııaǵa kelip túsken aqparatqa sáıkes, belgisiz adamdar merdiger uıymdardyń ókilderimen baılanysqa shyǵyp, ózderin «deldal» retinde tanystyryp júr. Olar ulttyq kompanııada baılanystary baryn aıtyp, belgili bir aqsha somasyna jol jobalaryn alýǵa, jumys kólemin bólýge nemese satyp alý rásimderiniń nátıjesine yqpal etýge kómektesetinin ýáde etedi.
— Keıbir jaǵdaılarda mundaı adamdar jeke kezdesýler uıymdastyryp, aldyn ala aqsha talap etedi. Sonymen qatar óz áreketteri «QazAvtoJol» ulttyq kompanııasynyń basshylyǵymen kelisilgenin aıtyp, jalǵan aqparat taratady, — delingen habarlamada.
«QazAvtoJol» ulttyq kompanııasy resmı túrde málimdeıdi: atalǵan tulǵalardyń kompanııa qyzmetine eshqandaı qatysy joq. Kompanııa basshylyǵy da, qyzmetkerleri de úshinshi tulǵalarǵa kelissóz júrgizý, jobalardy alyp berý, jetkizýshilerdiń múddesin ilgeriletý nemese tender nátıjesine yqpal etý boıynsha eshqandaı ókilettik bermegen.
— Barlyq satyp alý rásimderi Qazaqstan Respýblıkasynyń zańnamasyna sáıkes ashyq ári belgilengen tártippen júrgiziledi. Konkýrstar, qatysý sharttary, ótinim berý merzimderi jáne satyp alý qorytyndylary týraly aqparat tek Qazaqstan Respýblıkasynyń memlekettik satyp alý veb-portalynda jarııalanady, — dep habarlady «QazAvtoJol» kompanııasynan.
«QazAvtoJol» mundaı áreketterde alaıaqtyq, zańsyz deldaldyq, sondaı-aq naryq qatysýshylaryn sybaılas jemqorlyq shemalaryna tartý belgileri bolýy múmkin ekenin erekshe eskertedi.
Mundaı zańsyz áreketterge qatysý «máseleni sheship beremin» dep aqsha suraıtyn tulǵalarǵa ǵana emes, beıresmı kelisimge kelisken, qarajat bergen nemese zańdy rásimderden tys artyqshylyq alýǵa tyrysqan tulǵalarǵa da aýyr quqyqtyq saldarǵa ákelýi múmkin.
Ulttyq kompanııanyń Sybaılas jemqorlyqqa qarsy komplaens-qyzmeti sybaılas jemqorlyq táýekelderiniń aldyn alý, alaıaqtyq shemalardy anyqtaý jáne satyp alý rásimderin zańsyz aralasýdan qorǵaý boıynsha turaqty jumys júrgizedi. Osyndaı faktilerge qatysty barlyq ótinishter men habarlamalar qaralady. Quqyqbuzýshylyq belgileri anyqtalǵan jaǵdaıda materıaldar quzyretti organdarǵa joldanady.
— Kompanııa merdiger jáne qosalqy merdiger uıymdardy saq bolýǵa shaqyrady. Kúmándi adamdarǵa aqsha bermeńiz, beıresmı kelissózderge qatyspańyz jáne satyp alýǵa qatysty barlyq aqparatty tek resmı derekkózder arqyly tekserińiz, — dep eskertti kompanııadan.
«QazAvtoJol» «kómek kórsetemiz», «járdemdesemiz», «múddeńizdi ótkizemiz», «tender nátıjesine yqpal etemiz» nemese «jol jobasyn aqshaǵa alyp beremiz» degen usynystar tússe, bul týraly dereý kompanııanyń komplaens-qyzmetine habarlasý keregin surady.
Baılanys: jedel jeli: +7 (717-26) 4-87-35, elektrondyq poshta: hotline@qaj.kz
Kompanııa jol jobalary deldaldar, jeke kelisimder nemese aldyn ala tólemder arqyly bólinbeıdi. Kompanııa atynan «máseleni sheship beremin» degen kez kelgen ýáde — alaıaqtyq áreket ekenin eskertti. Mundaı faktiler zańda belgilengen tártippen toqtatylady.
Buǵan deıin «QazAvtoJol» jol paıdalanýshylardy ekologııalyq mádenıetti saqtaýǵa shaqyrdy.
