«QazAvtoJol» men qazaqstandyq bankter sındıkaty $700 mln deıingi somaǵa kredıttik kelisimge qol qoıdy
ASTANA. KAZINFORM — Jol salasyn qarjylandyrý jáne ınfraqurylymdyq jobalardy iske asyrýǵa ekinshi deńgeıdegi bankterdi tartý máselesi týraly dóńgelek ústelde «QazAvtoJol» ulttyq kompanııasy men Halyk Bank, TsentrKredıt Banki jáne Eýrazııalyq bank quramyndaǵy qazaqstandyq bankter sındıkaty arasynda kredıttik kelisimge qol qoıyldy. Bul týraly Úkimettiń baspasóz qyzmeti habarlady.
Kelisim Qazaqstannyń Damý Banki (QDB) aldyndaǵy QazAvtoJol-dyń qazirgi qaryzyn qaıta qarjylandyrý úshin $700 mln-ǵa deıingi somaǵa qarjylandyrý berýdi kózdeıdi.
Buǵan deıin ulttyq operator respýblıkalyq mańyzy bar avtomobıl joldaryn jóndeý jobalaryn iske asyrý úshin QDB qarajatyn tartqan bolatyn. Jańa kelisimge sáıkes qarjylandyrý 2034 jylǵa deıin beriledi. Sındıkattalǵan qarjylandyrýdy uıymdastyrýshy jáne agent-bank Halyk Bank bolyp otyr.
Premer-mınıstrdiń orynbasary – Ulttyq ekonomıka mınıstri Serik Jumanǵarın atap ótkendeı, qol jetkizilgen ýaǵdalastyqtar kredıttik júktemeni qarjy ınstıtýttary arasynda qaıta bólýge jáne jańa basym ınfraqurylymdyq jobalardy qarjylandyrý úshin QDB kredıttik lımıtiniń bir bóligin bosatýǵa múmkindik beredi.
– Memleket basshysy ekonomıkanyń naqty sektoryn qarjylandyrýǵa ekinshi deńgeıdegi bankterdiń neǵurlym belsendi qatysýy jáne iri jobalardy iske asyrýǵa jeke kapıtaldy tartý qajettigin birneshe ret atap ótti. Búgin biz osyndaı ózara árekettestiktiń naqty mysalyn kórip otyrmyz. Bul jerde sóz jol qurylysyna jańa qaryz alý týraly emes, kommertsııalyq bankterdiń qarajaty esebinen QDB aldyndaǵy qoldanystaǵy mindettemelerdi qaıta qarjylandyrý týraly bolyp otyrǵany asa mańyzdy. Bul bank sektorynyń ınfraqurylymdy qarjylandyrýǵa qatysýyn arttyryp qana qoımaı, damý ınstıtýtynyń resýrstaryn jańa jobalardy iske asyrýǵa baǵyttaýǵa múmkindik beredi, - dep atap ótti vıtse-premer.
Ekinshi deńgeıdegi bankterdi jol ınfraqurylymyn damytýǵa tartý ishki ınvestıtsııalyq resýrstardy qosymsha jumyldyrýǵa jáne iri ulttyq jobalardyń memlekettik qarjylandyrýǵa táýeldiligin tómendetýge múmkindik beredi. Mundaı tetik kommertsııalyq bankterdiń, bıýdjet shyǵystaryn jumsamaı-aq, ekonomıkany damytýǵa anaǵurlym belsendi qatysýyna jaǵdaı jasaıdy.
Aıta ketnıik, Jamaýbaev bankterdi naqty sektordy kóbirek kredıtteýge yntalandyrý sharalaryn atady.
