«QazAvtoJol» kompanııasy «E-QURYLYS» júıesiniń jańa kelisimsharttarda qoldaný merzimin atady

NUR-SULTAN. QazAqparat – «QazAvtoJol» UK» AQ tehnıkalyq saıasat jáne sapa departamentiniń dırektory Nurlan Qurmanbekov «E-QURYLYS» júıesiniń jańa kelisimsharttarda qoldaný merzimin atady, dep habarlaıdy QazAqparat tilshisi.

«E-QURYLYS júıesi qurylys protsesteri men qurylys jumystarynyń sapasyn baqylaýǵa arnalǵan júıe. Bul jýrnaldardy júrgizýdiń biryńǵaı júıesin, oryndaý qujattamalaryn, smeta qujattaryn aqparattyq alańǵa shyǵarýǵa múmkindik beredi. Osylaısha qaǵaz-qujat aınalymyn 66 paıyzǵa azaıtady. Sondaı-aq qujattardy maquldasý barysy da elektrondy formatqa aýystyrylady. ıAǵnı qazirgideı qaǵaz joldap júrmeı, maquldasý ýaqytyn qysqartyp, jumysty edáýir ońtaılandyramyz», - deıdi Nurlan Qurmanbekov kompanııanyń Instagram paraqshasynda suraqtarǵa jaýap bere otyryp.

Onyń aıtýynsha, E-QURYLYS júıesi qurylys jumysyna qatysýshylar tıisti qujattardyń bárin elektrondy túrde kóre alady.

«Qazirgi ýaqytta Qurylys jumystary jónindegi komıtetpen birge Qaraǵandy oblysynda merdigermen birlesip, pılottyq rejımde jóndeletin joldy aıqyndap aldyq. ıAǵnı E-QURYLYS baǵdarlamasynyń testtik synaǵy Qaraǵandy oblysynda ótkiziledi. Osy jyldyń sońyna deıin test aıaqtalyp, sonyń qorytyndysy boıynsha esep daıyndap, 2021 jyldyń І toqsanynan bastap bul júıe jańa kelisimsharttarda qoldanyla bastaıdy», - dedi ol.