«QazAvtoJol» kompanııasynyń qarajatyn jaýapty organdar jyl saıyn tekseredi – vıtse-mınıstr

ASTANA. KAZINFORM – Kólik vıtse-mınıstri Maqsat Qalıaqparov «QazAvtoJol» kompanııasynyń aqyly joldarǵa qatysty qarajatyna túsinik berdi.

- Zańǵa sáıkes, «QazAvtoJol» – ol ulttyq operator. Osy oraıda zańda aqyly joldan túsken qarajattyń qaı jumystarǵa jumsalýy kerek ekeni kórsetilgen. Bul rette, aqyly joldarda qar tazalaýǵa, tehnıka satyp alýǵa jáne basqa da jumystarǵa baǵattalady, - dedi M.Qalıaqparov Úkimet otyrysynan keıin tilshiler suraǵyna jaýap bere otyryp.

Onyń aıtýynsha, aqyly joldardan túsken qarajattyń artýyna qaraı respýblıkalyq bıýjetten bólinetin qarajat azaıady.

- Buryn bıýdjetten qarajat bólinse, qazir tólemaqydan túsken qarajatqa jumystardy atqaramyz. Bul qarajatty tek aqyly jolǵa jumsaı alamyz. Túsken qarajatty Joǵary aýdıtorlyq palata men ózge de quzyrly vedomstvolar tekseredi. Olar jyl saıyn jumsalǵan qarjyǵa tolyq esep beredi, - dedi vıtse-mınıstr.

Onyń sózine qaraǵanda, jaqyn arada «QazAvtoJol» qarjysyna qatysty Senat depýttaryna tıisti málimet usynylady.

Budan buryn habarlanǵandaı, jaqynda Senat tóraǵasy Máýlen Áshimbaev kvazımemlekettik kompanııalardyń esepshotynda eleýli qarjy túsimderi bar bolǵanyna qaramastan, olarǵa bıýdjetten qosymsha qomaqty somalar bólinetinin aıtyp, olardy tıimdi paıdalaný máselesi kóńil kóńshitpeıtinin sóz etti. 

Tek «QazAvtoJol» men «Jasyl Damý» kompanııalaryna ǵana bıýdjetten 730 mlrd teńge bólingen. Sonymen qatar qarajattyń jumsalýy týraly eseptilik árdaıym turaqty jáne tolyq kólemde berilmeıdi. Bul tıimsiz paıdalaný qaýpin týǵyzady jáne qoǵamnyń senimin tómendetedi.