«QazAvtoJol» fılıaly men «Pavlodar jol zerthanasy» basshylyǵy ústinen is qozǵaldy
PAVLODAR. QazAqparat - «QazAvtoJol» UK» AQ oblystyq fılıaly men «Pavlodar jol zerthanasy» basshylyǵyna qatysty QR QK-niń 366-babyna sáıkes tergeý júrgizilýde, dep habarlaıdy pavlodarnews.kz.
Bul týraly óńirlik kommýnıkatsııalar qyzmetinde ótken baspasóz máslıhatynda sybaılas jemqorlyqqa qarsy is-qımyl Ulttyq bıýrosy Pavlodar oblysy boıynsha departament basshysynyń orynbasary Darhan Quraqbaev málim etti.
«Qazirgi tańda oblystyq «QazAvtoJol» fılıaly men «Pavlodar jol zerthanasy» avtomobıl joldary komıteti basshylyǵyna qatysty merdigerlik uıymdardyń jetekshilerinen «Astana - Pavlodar» jolyn qalypqa keltirý boıynsha atqarylǵan jumys aktine qol qoıý úshin birneshe márte para aldy degen kúdikke qatysty qylmystyq is boıynsha tergeý júrgizilýde. Bul ýchaske «Nurly jol» baǵdarlamasy aıasynda júzege asyrylýda. Zańǵa qaıshy áreket bıylǵy jyldyń jaz jáne kúz mezgilinde jasalǵan. Qylmystyq-protsessýaldyq zańnama talaptaryna sáıkes sotqa deıingi tergeýdiń keıbir málimetterin jarııa ete almaımyz»,- dedi Darhan Quraqbaev.
Eske sala keteıik, «QazAvtoJol» Ulttyq kompanııasy Pavlodar oblysy boıynsha AQ bólimshesi dırektorynyń orynbasary Amantaı Qasymhanov «Nurly Jol» memlekettik baǵdarlamasy boıynsha «Ortalyq-Shyǵys» aımaǵyndaǵy kólik joldaryn qaıta jańǵyrtýǵa bólingen 3 mlrd teńge qarjy jymqyrdy degen kúdikpen tutqyndalǵan. Oǵan QR QK-niń úsh baby boıynsha aıyp taǵylǵan: «Sońyna deıin aıaqtalmaǵan qylmys jasaýǵa oqtalý», «Senip tapsyrylǵan bóten múlikti ıemdenip alý nemese talan-tarajǵa salý» jáne «Asa iri kólemde alaıaqtyq jasaý».
