QazAvtoJol boranǵa deıin 3-4 saǵat buryn qozǵalysty shekteýdi josparlaıdy
ASTANA. KAZINFORM — Qolaısyz aýa raıy kezinde jolda kólik pen jolaýshylardyń jınalyp qalýyna jol bermeý úshin qozǵalysty shekteý týraly sheshim qaýipti jaǵdaı bastalǵanǵa deıin shamamen 3-4 saǵat buryn qabyldanýy múmkin.
Bul týraly «QazAvtoJol» UK» AQ basqarma tóraǵasy Darhan Imanashev Ortalyq kommýnıkatsııalar qyzmetinde ótken brıfıngte málimdedi.
Onyń aıtýynsha, qys mezgilinde tótenshe jaǵdaılardyń aldyn alý úshin kompanııa Іshki ister mınıstrligimen, Tótenshe jaǵdaılar mınıstrligimen, «Qazgıdrometpen» jáne basqa da tıisti uıymdarmen birlesip jumys isteıdi.
Qozǵalysty ýaqytsha shekteý týraly sheshim aýa raıy boljamy men joldaǵy naqty jaǵdaıǵa qaraı qabyldanady. Negizgi maqsat — boran, kóktaıǵaq jáne ózge de qaýipti qubylystar kezinde jol-kólik oqıǵalaryna jol bermeý.
2025–2026 jyldardaǵy qysqy maýsymda respýblıkalyq avtomobıl joldarynda qozǵalysqa 2 022 ret shekteý qoıylǵan. Al 2026–2027 jyldardaǵy qysqy maýsym bastalǵaly, 10 qarashadaǵy jaǵdaı boıynsha, mundaı 52 sheshim qabyldanǵan.
— Jol qozǵalysyn ýaqytsha shekteý — eń aldymen adamdardyń ómiri men densaýlyǵyn qorǵaýǵa arnalǵan aldyn alý sharasy. Aýa raıy jaqsarǵannan keıin jol qyzmetteri qaýipsiz qozǵalysty múmkindiginshe tez qalpyna keltirý úshin qajetti sharalardy atqarady, — dedi Darhan Imanashev.
Júrgizýshilerge sapar aldynda aýa raıy boljamy men joldardyń jaı-kúıin tekserip, qozǵalysqa qoıylǵan shekteýlerdi eskerý usynylady.
Buǵan deıin respýblıkalyq mańyzy bar joldar boıynda 26 jańa qyzmet kórsetý orny ashylǵany týraly jazdyq.
