«QazAvtoJol» bir kózden 8,3 mlrd teńgege kelisimshartty zańsyz jasaǵan - depýtat
Senator bul salada aqshany tıimsiz paıdalaný jáne jymqyrý faktilerimen qatar, sheneýnikterdiń ókilettigin asyra paıdalaný derekteri de bar ekenin atap ótti.
«Bul saladaǵy júıeli kemshilikter joıylǵan joq. Keıbir merdiger uıymdarǵa qatysty konkýrstyq rásimderdi ótkizý kezinde sybaılas jemqorlyq belgileri bar tıisti artyqshylyqtar saqtalady. «Kvazımemlekettik sektordyń jekelegen sýbektileriniń satyp alý týraly» QR Zańynyń 4-babyn buza otyryp, «QazAvtoJol» bir kózden alý tásilimen jalpy somasy 8 mlrd astam teńgege zańsyz kelisimshart jasaǵan», - dedi depýtat.
A. Lýkın jol salasyna qomaqty bıýdjet qarajaty bólinip jatqanyna qaramastan, kólik ınfraqurylymyn damytý jáne tranzıttik áleýetti arttyrý tıisti deńgeıde emes ekenin basa aıtty. Bul rette memleket qarajatyn ysyrap etý, jymqyrý jáne basqa da sebepter salany damytýǵa keri áser etip otyr.
Osy oraıda depýtat Mınıstrler kabınetiniń basshysyna Avtomobıl joldary komıteti men «QazAvtoJol» kásipornynyń jumysyn baqylaýdy kúsheıtýdi usyndy.
«Sonymen qatar, merdigerlerden aıyppuldardy óndirip alý, sondaı-aq tıimdi tehnologııalardy keńinen qoldanýdy qamtamasyz etý boıynsha aldyńǵy qatarly sheteldik tájirıbeni eskere otyryp, joldardy sapaly salý jáne jóndeý úshin tıisti sheshimge kelýdi usynamyn», - dedi senator.
