«QazAvtoJol» basshysy qyzmetinen ketti
«QazAvtoJol «UK» AQ Basqarma tóraǵasy Meıirhat Qasymbaev qyzmetinen ketti. Ol bul týraly Instagram-daǵy paraqshasynda jazdy, dep habarlaıdy Kazinform.
Basqarma tóraǵasy óz sheshimimen qyzmetten ketkenin málim etti.
«Qurmetti dostar, qadirli áriptester! Búgin jeke sheshimime sáıkes «QazAvtoJol «UK» AQ Basqarma tóraǵasy qyzmetin aıaqtadym. Eki jylǵa jýyq ýaqyt ishinde áriptesterimmen birlese qurylysy uzaqqa sozylǵan joldardy qolǵa alyp, jobalardy aıaqtaý úshin aıanbaı eńbek ettik. Úlken jumys atqaryldy. Búgingi tańda respýblıkalyq avtojoldar jelisinde jumysy toqtap turǵan birde-bir jol jobasy joq dep senimmen aıta alamyn. Sońǵy eki jyl ishinde 7 mln tonna asfalt tóseldi. Bul degenimiz shamamen 2,5 myń shaqyrym jol jańa asfaltpen qamtyldy degen sóz.
El aýzynda júrgen Atyraý-Astrahan, Qaztalov-Jánibek-RF shekarasy, Ónege-Bısen-Saıhyn kúre joldarynda jumystar qaıta bastaldy. Bul joldardyń qurylysy aıaqtalýǵa jaqyn. Aqtóbe-Qandyaǵash, Úsharal-Dostyq, Taldyqorǵan-Qalbataý-Óskemen, Qaraǵandy-Balqash, Kúrti-Burylbaıtal, Merki - Burylbaıtal jáne t. b. baǵyttarda asfalt tóselip, jol qozǵalysy ashyldy. Memleket basshysynyń tapsyrmasyna sáıkes biryńǵaı avtojol kompanııasyn qurý aıasynda jumys júrgizdik. Jyl saıyn materıaldyq-tehnıkalyq baza men arnaıy jol tehnıka parki jańartylyp otyrdy. Arnaıy tehnıka sanyn 400 birlikke arttyrdyq. Bul joldardy kútip-ustaý jumystarynyń sapasyn edáýir jaqsartýǵa múmkindik beredi. Jasyratyny joq, avtojol salasy memleket basshysynyń tarapynan da, turǵyndarymyzdyń tarapynan da birneshe ret synǵa ushyrady. Joldyń máselesi bir kúnde sheshilmeıdi. Oń ózgeriske qol jetkizý úshin júıeli túrde jumystaný kerek. Prezıdenttiń tapsyrmasyna sáıkes byltyrdan beri salany reformalaý úshin birqatar shara qabyldanýda. Óz tarapymyzdan sheteldik tájirıbege súıene otyryp, quzyretti organdarǵa birqatar usynys joldadyq. Jolshynyń mamandyǵy kabınette otyrmaı, únemi qurylys basynda bolýdy talap etedi. Bul qaǵıdany saqtadyq», - dep jazdy ol.
Meıirhat Qasymbaev áriptesterine, jumysyna adal qaraǵan merdigerlerge jáne kúndiz-túni jolda júrgen árbir jolshy mamanǵa alǵys aıtty.
Aıta keteıik, Indýstrııa jáne ınfraqurylymdyq damý mınıstriniń buıryǵymen Meıirhat Meıramhanuly Qasymbaev «QazAvtoJol» UK» AQ Basqarma tóraǵasy qyzmetine 2022 jyldyń 1 aqpanynda taǵaıyndalǵan bolatyn.
