QazAvtoJol aýyr júk kóligi júrgizýshilerine mańyzdy eskertý jasady
ASTANA. KAZINFORM — «QazAvtoJol» UK» AQ júk tasymaldaýshylar men aýyr júk kólikteriniń ıelerine respýblıkalyq mańyzy bar jalpyǵa ortaq paıdalanylatyn avtomobıl joldarynda jaz mezgilinde qoldanylatyn ýaqytsha qozǵalys shekteýlerin eske saldy.
Kompanııanyń málimetinshe, shekteýler dara oske túsetin júktemesi 8 tonnadan asatyn avtokólik quraldaryna qatysty qoldanylady jáne tek aýa temperatýrasy +25 °C-tan joǵary bolǵan kezde, ár óńir úshin belgilengen ýaqyt aralyǵynda ǵana kúshine enedi.
Bul — júk kólikteriniń qozǵalysyna tolyq tyıym salý emes, aýyr júk kólikteriniń qozǵalysyn maýsymdyq retteý sharasy.
— Bul talaptardyń negizgi maqsaty — aptap ystyq kezeńinde jol jabynyn saqtaý. Joǵary temperatýranyń áserinen asfaltbeton qyzady jáne aýyr júktemege sezimtal bola túsedi. Osyndaı jaǵdaıda aýyr júk kólikteriniń qozǵalysy jolda izderdiń (oıyqtardyń), tolqyn tárizdi deformatsııalardyń jáne basqa da merziminen buryn paıda bolatyn aqaýlardyń qalyptasýyna sebep bolýy múmkin, — dep habarlady kompanııa.
1 maýsym men 15 tamyz aralyǵynda saǵat 11:00-den 21:00-ge deıin, aýa temperatýrasy +25 °C-tan joǵary bolǵan jaǵdaıda myna óńirlerde shekteýler qoldanylady:
- Abaı, Aqmola, Aqtóbe, Shyǵys Qazaqstan, Batys Qazaqstan, Qaraǵandy, Qostanaı, Pavlodar jáne Soltústik Qazaqstan oblystary.
1 maýsymnan 31 tamyzǵa deıin, saǵat 10:00-den 22:00-ge deıin, aýa temperatýrasy +25 °C-tan joǵary bolǵan jaǵdaıda shekteýler myna óńirlerde qoldanylady:
- Almaty, Atyraý, Jambyl, Qyzylorda, Mańǵystaý, Túrkistan oblystary, sondaı-aq Jetisý jáne Ulytaý oblystary.
Kórsetilgen ýaqyttan tys kezeńde, sondaı-aq aýa temperatýrasy +25 °C jáne odan tómen bolǵan jaǵdaıda kólik qozǵalysy belgilengen salmaqtyq jáne gabarıttik talaptardy saqtaı otyryp júzege asyrylady.
Sonymen qatar A-1 «Astana — Petropavl (Kókshetaý arqyly)» avtomobıl jolynyń 68-196 shaqyrym aralyǵynda erekshe talaptar belgilengen. Bul ýchaskede qıyrshyqtasty-mastıkalyq asfaltbeton jabyny qoldanylǵandyqtan, jaz mezgilinde aýa temperatýrasy +25 °C-tan joǵary bolǵan kezde dara oske túsetin júktemesi 9 tonnadan asatyn kólik quraldarynyń qozǵalysyna shekteý qoıylady.
Budan bólek, qoldanystaǵy normatıvterde qosarlanǵan, úshtik jáne ózge de os toptaryna túsetin shekti júktemeler belgilengen. Maýsymdyq shekteýler kezeńinde kólik quralynyń ruqsat etiletin jalpy massasy belgilengen normalardan 20 paıyzǵa tómendetiledi.
Jazǵy shekteýler tómendegi kólik quraldaryna qoldanylmaıdy:
- halyqaralyq sharttarǵa sáıkes halyqaralyq júk jáne jolaýshylar tasymalyn júzege asyratyn kólik quraldaryna;
- tótenshe jaǵdaılardyń aldyn alý jáne olardyń saldaryn joıý jumystaryna tartylǵan kólik quraldaryna;
- tez buzylatyn azyq-túlik ónimderin tasymaldaıtyn kólik quraldaryna;
- jolaýshylar men júk tasymalyn júzege asyratyn kólik quraldaryna;
- qaýipti júkterdi tasymaldaıtyn kólik quraldaryna;
- qaıta jańartý júrgizý úshin merdiger uıymdarǵa berilgen jol ýchaskelerindegi jol-qurylys jumystaryna tartylǵan tehnıkaǵa;
- Qazaqstan Respýblıkasynyń Qarýly Kúshterine, basqa da áskerler men áskerı quralymdarǵa tıesili, sondaı-aq áskerı tasymaldardy júzege asyratyn kólik quraldaryna;
- zardap shekkenderge gýmanıtarlyq kómek jetkizetin kólik quraldaryna.
