Qazavtojol: Aýa raıynyń qolaısyzdyǵyna baılanysty 5421 shaqyrym jol jabyldy
NUR-SULTAN. QazAqparat – Aýa raıynyń qolaısyzdyǵyna baılanysty 44 ýchaskede uzyndyǵy 5421 shaqyrym jol jabyldy, dep habarlaıdy QazAqparat tilshisi «Qazavtojol» UK» AQ baspasóz qyzmetine silteme jasap.
«Aýa raıynyń qolaısyzdyǵyna baılanysty 44 ýchaskede uzyndyǵy 5421 shaqyrym joldyń qozǵalysyna ýaqytsha shekteý qoıyldy. Bul elimizdegi respýblıkalyq mańyzy bar avtojoldardyń 21,7 paıyzyn quraıdy. Jalpy, jol qozǵalysy 12 oblysta jabyq. Onyń ishinde eń kóp jabylǵan jol ýchaskeleri – Aqmola men Qaraǵandy oblystaryna qarasty», - dep habarlaıdy «Qazavtojol» UK» AQ baspasóz qyzmetiniń basshysy Marjan Ordabaı.
Jol qoǵzalysyna shekteý qoıylǵan eń uzyn bólik – Ekaterınbýrg-Almaty tasjoly. Qazir joldaǵy qar kúreý jumystaryna 840 arnaıy tehnıka jumyldyrylǵan.
Aıta ketsek, buǵan deıin QR Іshki ister mınıstrligi Aqkólden Nur-Sultanǵa osy ýaqytqa deıin joldyń ashylýyn kútken 150 kólik kele jatqanyn habarlaǵan edi.
