«QazAvtoJol» Astana-Şýche avtobanyndaǵy kólik keptelisin joıý sharalaryn qolǵa aldy
ASTANA. QazAqparat - «QazAvtoJol» Astana-Şýche avtobanyndaǵy kólik keptelisin joıý sharalaryn qolǵa aldy. Bul týraly «QazAvtoJol» UK» AQ Korporatıvtik damý jónindegi basqarýshy dırektory Erjan Tórequlov málim etti.
«Astana-Şýche avtobanyndaǵy kólik keptelisin joıý úshin tek qana koreılik tájirıbemen shektelmeı, jalpy álemdik tájirıbege, Taıvan, Ońtústik-Shyǵys Azııa, Eýropa elderiniń tájirıbesin zerdeleımiz. Shynymen de bıyl jazda kólik keptelisi boldy, onymen jumys júrgizip jatyrmyz», - dedi ol.
Onyń atap ótýinshe, 2015 jyly bul joldan 1 mlrd. 143 mln., al aǵymdaǵy jyldyń 6 aıynda 533 mln. teńge kiris tústi. Bul qarjy joldy kútip ustaý shyǵyndaryna jumsalýda.
Sonymen qatar ol Astana-Pavlodar avtobany qurylysynyń toqtap turýyna qatysty da pikir bildirdi.
«Iá, quryltaıshylar arasynda daý bar. Bul daý sot tártibimen sheshilýde. «QazAvtoJol» ulttyq operator retinde jol qurylysy kestesinde irkilistiń bolmaýy úshin barlyq kúsh-jigerimizdi jumsap jatyrmyz», - dedi E.Tórequlov.
Esterińizge sala keteıik, taıaýda «Astana-Pavlodar-Qalbataý-Óskemen» respýblıkalyq mańyzy bar avtomobıl joly ýchaskesi qurylysynyń bas merdigeri, «Avtodorservıs» JShS quryltaıshylarynyń biri Vıtalıı Protsentov kompanııa quryltaıshylary arasyndaǵy daý saldarynan qurylys jumysynyń toqtap turǵanyn aıtqan edi.
