QazAvtoJol: aldaǵy tórt jylda Atyraý-Dossor joly 4 jolaqqa keńeıtiledi
ATYRAÝ. KAZINFORM — Respýblıkalyq mańyzy bar Atyraý — Dossor tasjolynyń tarlyǵy birneshe jyl boıy júrgizýshilerdiń bas aýrýyna aınalyp keldi. Óıtkeni, bul baǵytta iri kásiporyndar ornalasqan. Sáıkesinshe, kólik aǵyny artpasa, azaıǵan emes.
Osydan tórt jyl buryn 2022 jyly, sol kezdegi QR Indýstrııa jáne ınfraqurylymdyq damý mınıstrligi 2025 jyly 4 jolaqty Atyraý-Dossor avtojolynyń qurylysy bastalady dep málimdegen edi.
Alaıda osy ýaqytqa deıin bul jumys bastalmady. «QazAvtoJol» ulttyq kompanııasy jobany bıyl bastaýdy josparlap otyr. Jaýaptylar jalpy uzyndyǵy 86 shaqyrym joldy aldaǵy 4 jylda aıaqtamaq. Jobany «Azııa ınfraqurylymdyq ınvestıtsııalar» banki memlekettik kepildikke sáıkes qarjylandyrady. Ázirge qurylys jumysy 140 mlrd teńgege baǵalanyp otyr. Biraq bul jobalaý kezinde ózgerýi yqtımal.
— Aqpan-naýryzda merdiger mekeme anyqtalady. Olarǵa jobalyq-smetalyq qujat jasaýǵa 1 jyl ýaqyt beriledi. Qurylys-montaj jumysyna 3 jyl kerek. Qurylysy aıaqtalǵannan keıin 7 jyl merdiger kútip ustaýǵa mindetti, — dedi «QazAvtoJol» UK Atyraý oblysy fılıalynyń dırektory Arman Qaıredenov.
Qazirgi ýaqytta bul jol úshinshi sanatqa jatady. Jańa joba boıynsha jol birinshi sanatqa aýysady.
Byltyr atalǵan jolda 43 jol-kólik oqıǵasy bolyp, 24 adam qaza tapqan. Al bıyl jyl bastalǵaly 2 apat tirkelipti.
Búginde Dossor — Qulsary jáne Qulsarydan — Mańǵystaý oblysy shekarasyna deıingi ýchaskelerde ortasha jóndeý jumystary júrgizilip jatyr. Byltyr 38 shaqyrym paıdalanýǵa berilse, búginde Dossordan shyǵa beristegi 66 shaqyrym jolda jóndeý jumystary júrip jatyr. Al Mańǵystaýǵa deıingi joldy tórt jolaqty etý máselesi Atyraý — Dossor baǵyty aıaqtalǵannan keıin ǵana qaralmaq.
Osyǵan deıin Atyraýdaǵy keptelisti azaıtatyn jobany aıaqtaý merzimi taǵy bir jylǵa uzarǵanyn jazǵan edik.