«QazAvtoJol» 70 myń júrgizýshiniń aqshasyn qaıtarady

Kólik prokýrorlarynyń aktisimen «QazAvtoJol» 70 myń avtojúrgizýshige aqshasyn qaıtarady, dep habarlaıdy Kazinform Bas kólik prokýratýrasynyń baspasóz qyzmetine silteme jasap.

Qaraǵandy kólik prokýratýrasy aqyly avtomobıl joldarymen júrý negizderi týraly jarııa shartta avtokólik júrgizýshileriniń quqyqtaryna qaıshy keletin talapty anyqtady.

Atap aıtqanda, jedel jol qyzmetterin tutynýshylar kólik quralynyń memlekettik tirkeý nómirlik belgisin aýystyrǵan jaǵdaıda paıdalanylmaǵan tólemderdi qaıtara alatyn tarmaq bolmaǵan.

Búgingi tańda, tıisti túzetýler engizilip, aqparat berý maqsatynda «Qazavtojol» AQ-nyń resmı saıttarynda ornalastyryldy (www.qaj.kz, www.1403.kz).

Jalpy, prokýratýranyń taldaýy Qaraǵandy oblysy boıynsha 69 myń avtokólik júrgizýshisine 38 mln teńgeden astam somaǵa avanstyq tólemder qaıtarylmaǵanyn kórsetti.

Prokýratýranyń aralasýynan keıin ǵana tutynýshylardyń múliktik quqyqtaryn qalpyna keltirý jumystary bastaldy.

Sondaı-aq, Ulttyq operatordyń múddelerin qorǵaý óte álsiz júrgizilgeni anyqtaldy, sebebi osy qyzmetterdi 138 myń tutynýshynyń 3 jyl ishinde jalpy somasy 50 mln teńgege bereshegi jınaqtalǵany belgili boldy.

Kóbinese mundaı adamdarǵa qatysty materıaldar aqyly avtomobıl joldarymen júrgeni úshin ýaqtyly tólenbeý belgileri boıynsha olardy ákimshilik jaýapqa tartý maqsatynda kóliktik baqylaý ınspektsııasyna joldanbaǵan.

Prokýratýranyń aktisi boıynsha «Qazavtojol» AQ fılıalynyń basshylary jol aqysyn tólemegen avtokólik júrgizýshilerine qatysty ákimshilik yqpal etý sharalarynan alshaqtatqany úshin tártiptik jaýapqa tartyldy.

Atalǵan jumys elimizdiń barlyq óńirlerinde júrgiziletin bolady.