«Qazavıaqutqarý» basshysyn qamaýda ustaý merzimi sozyldy
ALMATY. QazAqparat - Sot «Qazavıaqutqarý» AQ-nyń bas dırektory Málik Dosymbekovty qamaýda ustaý merzimin bir aıǵa sozdy, dep habarlaıdy QazAqparat tilshisi.
Almaty qalalyq sotynyń baspasóz qyzmetinen habarlaǵandaı, sanktsııany №2 Medeý aýdandyq soty bergen. M.Dosymbekovke qamaýda ustaý merzimi 2017 jyldyń 13 qazanyna deıin uzartyldy. Onymen birge QR AShM «Qazavıaormanqorǵaý» AQ-nyń birinshi basshysy Tóleýǵazy Seksenbaev ta tutqynǵa alynǵan bolatyn. Bul tulǵalarǵa qatysty QR QK 366-babynyń 4-bóligimen para aldy degen aıyp taǵylyp otyr.
QR Sybaılas jemqorlyqqa qarsy is-qımyl ulttyq bıýrosynan málim etkendeı, ústimizdegi jyldyń 13 shildesi kúni «Qazavıaqutqarý» AQ dırektory M. Dosymbekov pen Aýyl sharýashylyǵy mınıstrliginiń «Qazavıaormanqorǵaý» mekemesiniń bas dırektory T. Seksenbaev sheteldik kompanııanyń basshysynan 50 myń dollar para alyp, quny 12 mıllıon dollar turatyn «MI-171E» tikushaǵyn satyp alý boıynsha kelisimshartqa qol qoıyp jatqan jerinen ustaldy.
