«Qazavıaqutqarý»: árbir áýe operatsııasynyń artynda jedel basqarý ortalyǵynyń eńbegi tur
ASTANA. KAZINFORM- Tótenshe jaǵdaılar mınıstrligi avıatsııasynyń árbir ushýynyń artynda áýe kemesi ekıpajynyń eńbegi men «Qazavıaqutqarý» AQ búkil ujymynyń úılesimdi jumysy tur.
QR Tótenshe jaǵdaılar mınıstrligi baspasóz qyzmetiniń habarlaýynsha, áýe kemesin ushýǵa daıyndaýdan bastap, tapsyrmany oryndaý men qonýǵa deıingi ár kezeńge ondaǵan maman jumyldyrylady. Olardyń árqaısysy ózine júktelgen mańyzdy mindetti atqarady.
Bul júıedegi negizgi býyndardyń biri – Jedel basqarý ortalyǵy. Onyń mamandary táýlik boıy avıatsııalyq operatsııalardy úılestirip, qajetti aqparattyń ýaqtyly berilýin jáne múddeli qyzmettermen ózara is-qımyldy qamtamasyz etedi.
Osyndaı jaýapty jumysty «Qazavıaqutqarý» AQ Jedel basqarý ortalyǵynyń jedel kezekshisi Alma Muhamedıeva atqarady. Ol úshin jumystyń basty nátıjesi – qoıylǵan mindetti sátti oryndaý jáne adamdardy qutqarý. Almanyń aıtýynsha, dál osyndaı sátter óz mamandyǵynyń mańyzyn tereń sezinýge múmkindik beredi.
-Ushqyshtarymyz árdaıym aman-esen bolyp, áýe kemelerimizdiń ushýy men qonýy sátti ótsin. Aspanymyz ashyq, elimizde beıbitshilik pen tynyshtyq ornap, halqymyz aman bolsyn! – deıdi Alma.
Kezekshilik kezinde áýe kemeleriniń ushýy men qonýy baqylanyp, tıisti aqparat múddeli quzyrly organdarǵa ýaqtyly jetkiziledi. Sonymen qatar kelesi kúnge arnalǵan ushý josparlary ázirlenip, týyndaǵan uıymdastyrýshylyq máseleler jedel sheshiledi.
Tótenshe jaǵdaı týyndaǵan kezde jedel kezekshilerdiń jumysy odan ári qarqyndaı túsedi. Qajetti adam kúshi men tehnıka jumyldyrylyp, barlyq múddeli qyzmetterdiń ózara is-qımyly qamtamasyz etiledi. Mundaı sátterde aqparatty jedel alý, durys sheshim qabyldaý jáne tapsyrmalardy ýaqytyly jetkizý erekshe mańyzǵa ıe.
-Bul jumys joǵary jaýapkershilikti, sabyrlylyqty, tózimdilikti jáne kez kelgen jaǵdaıda jedel sheshim qabyldaı bilýdi talap etedi. Jedel kezekshiler sanıtarııalyq avıatsııa reısterin, izdestirý-qutqarý jumystaryn, evakýatsııany, órt sóndirýdi, tótenshe jaǵdaılardyń saldaryn joıýdy jáne basqa da arnaıy mindetterdi uıymdastyrýǵa qatysady,-delingen habarlamada.
Osyǵan deıin TJM Almaty oblysyndaǵy taý kólderin baqylaý beketterin ashqany týraly jazdyq.
