«Qazavıa» basshysy apatqa ushyraǵan ıAk-12M ushaǵyna qatysty túsinik berdi
ASTANA. QazAqparat - Azamattyq avıatsııa komıteti tóraǵasy orynbasarynyń mindetin atqarýshy- bas memlekettik avıatsııalyq ınspektory Toty Ámirova qaýipsizdik erejeleriniń saqtalmaýy saldarynan daýǵa ilinip jatatyn áýe kompanııalarynyń basshylaryn qatań synǵa aldy, dep habarlaıdy «QazAqparat» HAA tilshisi.
Avıatsııalyq qaýipsizdik máselesi talqylanǵan jıynda Toty Ámirova aldymen «QAZAVIA» táýelsiz kompanııasy» JShS dırektory Sergeı Sýhorýkovqa syn aıtty.
«Ushaq bortyna jolaýshy qalaı otyryp júr?» degen suraqqa kompanııa basshysy jaýap berdi.
«Ushý barysynda jolaýshylardy bortqa otyrǵyzbaımyz. Qosymsha oryndar bar, bul qaıǵyly jaǵdaıǵa deıin de talap sondaı boldy. Menińshe, qojalyq basshysy komandırdi daladaǵy eginin baqylaý úshin kóndirip alǵan sekildi. Komandırdiń nelikten jolaýshyny bortqa alyp júrgeni túsiniksiz. Ol eskertilip edi. Jylyna eki ret túsindirý jumystary júrgiziledi. Taǵy da qosymsha nusqaý bolady», - deıdi Sergeı Sýhkorýkov.
Toty Ámirova qaýipsizdik erejeleri saqtalmaǵan jaǵdaıda komıtet lıtsenzııany tartyp alatynyn eskertti. Buǵan qosa taǵy birneshe áýe kompanııalarynyń basshylary synǵa ilikti.
«Kóndirdi degen sebep bolmaý kerek. Demek, áýe kompanııasynyń ishki tártibi nashar. Eger tıisti shara qabyldamasańyzdar, qatań túrde sheshim qabyldaıtyn bolamyz. Biz ushqyshtyń nemese áýe kompanııasynyń lıtsenzııasyn alatyn bolamyz», - dedi Toty Ámirova.
Eske sala ketsek, 27 shildede ıAk-12M ushaǵy apatqa ushyraǵan bolatyn. Áýe apatynan 54 jastaǵy Halıt Aqberdınov pen 39 jastaǵy sharýa qojalyqtyń basshysy Másimjan Másimov kóz jumǵan. Ushaq komandıriniń 33 jyldyq ótili bolǵan. Áýe apatynan mert bolǵandar otbasyna ıAk-12M ushaǵy tıesili «QAZAVIA» táýelsiz kompanııasy» JShS kómek berip jatyr.
