«QazÁýeQutqarý» men «Qazáýeormanqutqarý» mekemeleriniń basshylary sottaldy
ALMATY. QazAqparat - Almatyda «QazÁýeQutqarý» AQ basshysy Málik Dosymbekov pen «Qazáýeormanqutqarý» RMKK dırektory Tóleýǵazy Seksenbaevqa qatysty sot úkimi shyqty, dep habarlaıdy QazAqparat tilshisi sot zalynan.
Almaty mamandandyrylǵan aýdanaralyq sotynyń sýdıasy Martpek Kákimjanov «QazÁýeQutqarý» AQ basshysy Málik Dosymbekovty 7 jylǵa bas bostandyǵynan aıyrý týraly úkim shyǵardy.
Al «Qazáýeormanqutqarý» RMKK dırektory Tóleýǵazy Seksenbaev 3 jylǵa bas bostandyǵynan aıryldy. Ekeýine de ómir boıy memlekettik qyzmetke taǵaıyndalýǵa tyıym salyndy.
Aıta ketý kerek, Seksenbaev pen Dosymbekov quny 12 mln dollar bolatyn «MI-171E» tikushaǵyn satyp alý týraly kelisimge qol qoıý úshin sheteldik kompanııa ókilinen 50 000 AQSh dollary kóleminde para alǵan soń ustalǵan bolatyn.
Ulttyq bıýro ókilderiniń habarlaýynsha, jalpy kelisilgen para kólemi 100 myń AQSh dollary bolǵan. Odan bólek aıyptaý aktisinde Tóleýǵazy Seksenbaevtyń tikushaqtardy jeke maqsatyna paıdalanyp, aınalasyndaǵylardy tegin tasymaldaǵany atalyp ótti.
Osylaısha QR AShM «Qazáýeormanqutqarý» RMKK dırektory Tóleýǵazy Seksenbaev QR QK senip tapsyrylǵan ózgeniń múlkin jymqyrý, qyzmettik ókilettigin asyra paıdalanýǵa kómektesý, ózgeniń múlkin jymqyrýǵa ıtermeleý, qyzmettik ókilettigin asyra paıdalaný, para alý baptary boıynsha aıyptaldy.
Al QR ІІM TJK «Qazáýequtqarý» AQ dırektory Málik Dosymbekovke QR QK-niń senip tapsyrylǵan ózgeniń múlkin jymqyrý, qyzmettik ókilettiligin asyra paıdalanýǵa kómektesý, ózgeniń múlkin jymqyrýǵa ıtermeleý, qylmystyq toptyń múddesi úshin qyzmettik ókilettigin asyra paıdalaný, para alý baptary boıynsha aıyp taǵyldy.
