«Qazáýequtqarý» men «Qazáýeormanqorǵaý» basshylary memleket aqshasyn qalaı shashqan
ALMATY. QazAqparat - «Qazáýequtqarý» AQ men «Qazáýeormanqorǵaý» kásiporny basshylarynyń soty bastaldy, dep habarlaıdy QazAqparat tilshisi.
Aıyptaý aktisine sáıkes, «Qazáýequtqarý» dırektory Dosymbekov Málik pen «Qazáýeormanqorǵaý» basshysy Tóleýǵazy Seksenbaev Qytaı kompanııasynyń ókili Lı Hýaodan «Mı - 171E» tikushaǵyn jetkizý týraly kelisimge qol qoıý úshin 100 myń AQSh dollary kóleminde para berýdi suraǵan.
«2017 jyldyń 10 maýsymynda 50 myń AQSh dollary kartaǵa túsken. 13 maýsymda Dosymbekov 49 403 AQSh dollaryn sheship alǵan. Bul aqshanyń 19 myńy teńgege aýystyrylyp, 6 mln 292 myń teńge bolǵan. Bankten shyǵyp kele jatqanda Dosymbekovti Almaty korrýptsııaǵa qarsy qyzmeti mamandary ustady. Dosymbekovte 30 myń AQSh dollary men 6 mln teńge bolǵan», - dedi prokýror Aıan Aqberdıev.
Memlekettik aıyptaýshy sotqa deıingi tergeý barysynda sottalýshylardyń qyzmettik laýazymyn asyra paıdalanǵanyn anyqtady. Atap aıtqanda, olar adamdardy qaǵaz júzinde jumysqa alyp, tólengen jalaqyny qaltalaryna basyp otyrǵan.
«Qazáýeormanqorǵaý» RMKK dırektory T.Seksenbaevtyń úıin tazalaıtyn aýla sypyrýshy qaǵaz júzinde Jambyl avaıtobynyń desant-órt sóndirýshisi retinde jumysqa alynǵan. Jalaqysy 42650 teńge bolǵan. Biraq is júzinde ol jumys jasamaǵan.
«Jalpy alǵanda aýla sypyrýshy Rıazantsev aýla sypyrýshy retinde 2016 jyldyń naýryzynan mamyryna deıin 224 myń 473 teńge alǵan, sonymen qatar Jambyl desantynyń órt sóndirýshisi retinde 66 myń teńge syıaqy alǵan. Osylaısha Seksenbaev QR QK 189-babynyń 3-bólimimen qyzmetin paıdalana otyryp ózine senip tapsyrylǵan memleket qarjysyn talan-tarajǵa saldy degen aıyp taǵyldy», - dedi memlekettik aıyptaýshy.
2017 jyldyń sáýirinde Seksenbaev pen Dosymbekov 28 ushqysh baqylaýshyny jumysqa qabyldaý kezinde de alaıaqtyq jasaǵan.
«Seksenbaev ekeýara kelisimshartty buzamyn dep qorqyta otyryp Dosymbekovke 28 baqylaýshy ushqyshty jarty stavkamen qabyldaý kerektigin aıtqan. Dosymbekov bul ushqyshtar jumys istemeıtinin bile otyryp, kelisim bergen. 2016 jyldyń mamyrynan maýsymyna deıin «Qazáýeormanqutqarý» RMKK 28 baqylaýshy ushqyshyna 7,8 mln teńge kóleminde jalaqy túsken. Odan ary da 11,7 mln teńge túsý kerek bolatyn. Biraq, Dosymbekov pen Seksenbaev ustalǵan soń bul toqtatyldy», - dedi prokýror.
Sonymen qatar, Seksenbaev tikushaqtardy óz maqsatynda paıdalanyp, aınalasyndaǵylardy tegin tasymaldaǵan.
Ol memlekettik tikushaqtardy jeke maqsatta paıdalanyp, kýrortqa baryp demalǵan.
«Shyǵys Qazaqstan oblysynda ornalasqan Rahmanov bulaǵy baqylanýy tıis jospardaǵy oryndar qatarynda bolmaǵan. Seksenbaev pen onyń aınalasyndaǵylar ol jerge demalýǵa barǵan», - dedi ol.
Osylaısha QR AShM «Qazáýeormanqutqarý» RMKK dırektory Tóleýǵazy Seksenbaev QR QK senip tapsyrylǵan ózgeniń múlkin jymqyrý, qyzmettik ýákilettiligin asyra paıdalanýǵa kómektesý, ózgeniń múlkin jymqyrýǵa ıtermeleý, qyzmettik ýákilettigin asyra paıdalaný, para alý baptary boıynsha aıyptaldy.
Al QR ІІM TJK «Qazáýequtqarý» AQ dırektory Málik Dosymbekovke QR QK senip tapsyrylǵan ózgeniń múlkin jymqyrý, qyzmettik ýákilettiligin asyra paıdalanýǵa kómektesý, ózgeniń múlkin jymqyrýǵa ıtermeleý, qylmystyq top maqsatynda qyzmettik ýákilettigin asyra paıdalaný, para alý baptary boıynsha aıyp taǵyldy.
Aıta ketý kerek, Seksenbaev pen Dosymbekov quny 12 mln dollar bolatyn "MI-171E" tikushaǵyn satyp alý týraly kelisimge qol qoıý úshin sheteldik kompanııa ókilinen 50 000 AQSh dollary kóleminde para alǵan soń ustalǵan bolatyn.
Ulttyq bıýro ókilderiniń habarlaýynsha, jalpy kelisilgen para kólemi 100 AQSh dollary bolǵan.
