«Qazáýequtqarý» isi: 28 ushqysh memleketten tólengen jalaqyny qaıtardy
ALMATY. QazAqparat - Almatyda «Qazáýequtqarý» isi boıynsha sot jalǵasyp jatyr. Sotta qaǵaz júzinde ǵana jumys jasap jalaqy alyp otyrǵan «Qazáýeormankúzeti» RMKK 28 ushqyshynan jaýap alyndy, dep habarlaıdy QazAqparat tilshisi.
Aıyptaý aktisine sáıkes, «Qazáýeormankúzeti» bas dırektory Tóleýǵazy Seksenbaevtyń bastamasymen 2016 jyldyń mamyrynan maýsymyna deıin «Qazáýeormankúzeti» RMKK 28 ushqysh-baqylaýshysy «Qazáýequtqarý» RMKK formaldy túrde jumysqa qabyldanǵan.
«Tóleýǵazy Seksenbaev ekeýara kelisimshartty buzamyn dep qorqyta otyryp «Qazáýequtqarý» basshysy Málik Dosymbekovke 28 baqylaýshy ushqyshty jarty stavkamen 140 000 teńge jalaqyǵa qabyldaý kerektigin aıtqan. Negizi ushqyshtar «Qazáýeormankúzeti» RMKK tolyq jumys jasap, ekinshisine túk qatysy bolmaǵan. Dosymbekov bul ushqyshtar jumys istemeıtinin bile otyryp, kelisim bergen», - dedi memlekettik aıyptaýshy.
Sot otyrysyna qatysqan kýágerler - 28 ushqysh jalaqylarynyń jartysyn «Qazáýeormankúzeti» uıymynan, jartysyn «Qazáýequtqarý» mekemesinen alyp otyrǵanyn aıtty.
«Qazáýequtqarý» mekemesine aýystyrý týraly jeke kelisimsharttarǵa qol qoıdyq. Eki kásiporynnan jalaqy alyp otyrdyq. Biraq «Qazáýeormankúzetinde» 8 saǵat tolyq jumys jasadyq. Órt bolǵanda odan da kóp jumys jasaldy. Tergeý bastalǵan kezde «Qazáýequtqarý» jalaqysyn zańsyz alyp otyrǵanymyzdy bildik. 2 aıda alǵan jalaqymyzdy qaıtardyq», - dedi ushqysh baqylaýshy Janat Mambaev.
2016 jyldyń mamyrynan maýsymyna deıin «Qazáýeormanqutqarý» RMKK 28 baqylaýshy ushqyshyna 7,8 mln teńge kóleminde jalaqy túsken. Odan ary da 11,7 mln teńge túsý kerek bolatyn. Biraq, «Qazáýequtqarý» dırektory Málik Dosymbekov pen Tóleýǵazy Seksenbaev ustalǵan soń toqtatyldy.
Aıta ketý kerek, Seksenbaev pen Dosymbekov quny 12 mln dollar bolatyn «MI-171E» tikushaǵyn satyp alý týraly kelisimge qol qoıý úshin sheteldik kompanııa ókilinen 50 000 AQSh dollary kóleminde para alǵan soń ustalǵan bolatyn. Ulttyq bıýro ókilderiniń habarlaýynsha, jalpy kelisilgen para kólemi 100 AQSh dollary bolǵan.
Odan bólek aıyptaý aktisinde Tóleýǵazy Seksenbaevtyń tikushaqtardy jeke maqsatyna paıdalanyp, aınalasyndaǵylardy tegin tasymaldaǵany atap ótildi.
«Ol memlekettik tikushaqtardy jeke maqsatta paıdalanyp, kýrortqa baryp demalǵan. «Shyǵys Qazaqstan oblysynda ornalasqan Rahman qaınary baqylanýy tıis jospardaǵy oryndar qatarynda bolmaǵan. Seksenbaev pen onyń aınalasyndaǵylar ol jerge demalýǵa barǵan», - degen bolatyn prokýror.
Osylaısha QR AShM «Qazáýeormanqutqarý» RMKK dırektory Tóleýǵazy Seksenbaev QR QK senip tapsyrylǵan ózgeniń múlkin jymqyrý, qyzmettik ýákilettiligin asyra paıdalanýǵa kómektesý, ózgeniń múlkin jymqyrýǵa ıtermeleý, qyzmettik ýákilettigin asyra paıdalaný, para alý baptary boıynsha aıyptaldy.
Al QR ІІM TJK «Qazáýequtqarý» AQ dırektory Málik Dosymbekovke QR QK-niń senip tapsyrylǵan ózgeniń múlkin jymqyrý, qyzmettik ýákilettiligin asyra paıdalanýǵa kómektesý, ózgeniń múlkin jymqyrýǵa ıtermeleý, qylmystyq top maqsatynda qyzmettik ýákilettigin asyra paıdalaný, para alý baptary boıynsha aıyp taǵyldy.
