QazATÝ sybaılas jemqorlyqqa boı aldyra qoımaǵan ýnıversıtetterdiń biri - senator O. Ábdikárimov
ASTANA. 10 mamyr. QazAqparat - Astanadaǵy S.Seıfýllın atyndaǵy Qazaq agrotehnıkalyq ýnıversıteti Qazaqstannyń jemqorlyqpen kúreste meılinshe joǵary tabystarǵa jetken birden bir joǵary oqý orny.
Bul týraly búgin ýnıversıtet qabyrǵasynda jemqorlyqty aldyn alýǵa arnalǵan jıyn barysynda QR Parlament senatynyń depýtaty, «Nur Otan» HDP Respýblıkalyq jemqorlyqqa qarsy kúres qoǵamdyq keńesiniń tóraǵasy Oralbaı Ábdikárimov aıtty.
«Qazirgi ýaqytta elde sybaılas jemqorlyqtyń aldyn alýǵa baǵyttalǵan aılyq aktsııasy bastaldy. Barlyq uıymdar, departamentter bul iske tartylyp jatyr. Sizderdiń ýnıversıtetterińiz JOO arasynda eń alǵashqylardyń biri bolyp, atalmysh aktsııa aıasynda osynaý sharany uıymdastyryp otyr. QazATÝ sybaılas jemqorlyqqa boı aldyra qoımaǵan JOO-lardyń biri. Sebebi ýnıversıtettiń birde bir fakti boıynsha áli aty atalǵan joq. Bul árıne professorlyq-oqytýshylar quramyna jáne stýdentterge baılanysty. Ýnıversıtettiń osy saladaǵy tájirıbesi aılyq aıaqtalǵannan soń jalpyǵa taratylýy múmkin», - dedi O. Ábdikárimov.
S.Seıfýllın atyndaǵy Qazaq agrotehnıkalyq ýnıversıtetiniń rektory Kúrishbaevtyń aıtýynsha, ýnıversıtette arnaıy qadaǵalaýshy komıssııa jumys jasaıdy. Ol stýdentterdiń quqyqtaryn qorǵap, JOO-da paraqorlyq pen sybaılas jemqorlyq faktilerin anyqtaýǵa, aldyn alýǵa qyzmet etedi.
Sonymen qatar ýnıversıtette jemqorlyqpen kúres boıynsha jospar qabyldanǵan.
«Fakýltetterde kelesideı qyzmettik tártip ornatylǵan: oqytýshy tarapynan zańǵa qaıshy áreket jasalsa, fakýltet meńgerýshisi jaýap tartady. Al fakýltet meńgerýshisiniń isine dekan jaýap beredi», - deıdi rektor.
Búgingi jıyn barysynda jemqorlyqpen kúres sharalarynyń qorytyndylary jarııalanyp, quqyq qorǵaý organdary qyzmetkerlerimen pikir almasý, tájirıbeni jetildirý boıynsha talqylaýlar ótkizildi.
