QazATÝ-dyń «Erekshe kıiz úıi» Otandyq rekordtar kitabyna endi
ASTANA. 27 sáýir. QazAqparat - 13 jasqa kelip, tuńǵysh músheldi artqa qaldyrǵan bas qalanyń qurmetine S.Seıfýllın atyndaǵy Qazaq agrotehnıkalyq Ýnıversıtetiniń ǵalymdary Naýryz kúni erekshe tartý jasaǵan bolatyn.
Qazaqtyń saıyn dalasy tósinde ósetin 13 túrli dándi daqyldan ekshep qurastyrylǵan «Erekshe kıiz úı» jobasynyń tanystyrylymy bıylǵy Ulystyń uly kúni ótti. Astana qalalyq ákimdiginiń aldynda uıymdastyrylǵan bul sharaǵa otandastarymyz ben sheteldik meımandar tańdaı qaǵa tamsanyp, japatarmaǵaı sýretke túsken sátter týraly buǵan deıin jazǵan bolatynbyz. Endi, mine, kúni keshe Almaty qalasynan aqjoltaı súıinshi habar jetti, dep habarlaıdy atalmysh oqý ornynyń baspasóz qyzmeti.
Qazaqstandyq rekordtar kitabynyń jetekshisi Nadejda Kýrbatovanyń málimdeýinshe QazATÝ ǵalymdarynyń ǵylymı jańalyqtary engen atalmysh kıiz úı Otandyq rekordtar kitabyna enip otyr. Eldegi qaıtalanbas erekshe jańalyqtardy ekshep, jınaq etip shyǵaryp júrgen atalmysh ujym múshelerin kıiz úıdi daıyndaý barysynda birde-bir shegeniń qoldanylmaǵandyǵy tańǵaldyrypty. Kıiz úıdi jasaý barysynda jelim retinde qoldanylǵan un Aqmola óńiriniń bıdaıynan jasalǵan. Bezendirý jumystaryna qoldanylǵan bıdaı sabaqtarynyń tórt túri men masaqtary da S.Seıfýllın atyndaǵy ýnıversıtettiń agronomııa fakýltetiniń ǵalymdary V.K.Shıvchıenko jáne Q.Mýsınov oılap tapqan «Kenjeǵalı», «Dostyq» atty bıdaıdyń jańa túrleri bolyp tabylady.
Kıiz úıdiń mańdaıshasyna qaraqumyq, kúrish, suly syndy dándi daqyldardan Astana qalasynyń logotıpi salynsa, eki esiktiń japsaryna 55 sany dánmen órnektelgen. Bul atalmysh ýnıversıtettiń 55 jyldyq tarıhynan syr shertken edi. Kıiz úı ornatylǵan tuǵyr eniniń 57 santımetr bolýy da QazATÝ-dyń ótken ǵasyrdyń 57-jyly ashylǵandyǵyn meńzep tur.
Osylaısha Astananyń alǵashqy múshel jasyna arnalǵan «Erekshe kıiz úı» jobasy Qazaqstandyq rekordtar kitabyna endi.
