QazATÝ-da jas aqyn-jazýshylardyń «Otan dep soǵar júregim» atty jınaǵynyń tusaýy kesildi

ASTANA. 26 qarasha. QazAqparat - Búgin S. Seıfýllın atyndaǵy Qazaq agrotehnıkalyq ýnıversıtetinde 1 jeltoqsan - Tuńǵysh Prezıdent kúnine oraı «Jas túlek» shyǵarmashyl jastar klýby músheleriniń «Otan dep soǵar júregim» atty jınaǵynyń tusaýkeseri ótti.

Sharaǵa oqý ornynyń rektory Aqylbek Kúrishbaev pen QR Jazýshylar odaǵynyń tóraǵasy, QR Parlamenti Senatynyń depýtaty Nurlan Orazalın qatysty.

«Qazaq halqynda óner aldy sóz bolǵandyqtan, sender agrotehnıkalyq mamandyqqa oqyp jatqandaryńa qaramastan, qoldaryńa qalam alyp, júrek únderińdi qaǵaz betine túsirip júrsińder. Osy jolda tek jetistikke jete berińder», - dedi N. Orazalın óz óleńderin naqyshyna keltirip oqyp bergen jas aqyndarǵa batasyn berip.

Jınaqqa jalpy sany 35 jas aqyn-jazýshynyń qazaq jáne orys tilderindegi shyǵarmalary engizilgen. Sondaı-aq, rektordyń atap ótýinshe, kitaptyń elektrondy nusqasy da ázirlenip, ol ınternet oqyrmandaryna jol tartpaq.