QazATÝ-da tanymal qazaqstandyq sýretshilerdiń sýret galereıasy ashyldy

NUR-SULTAN. QazAqparat - Sáken Seıfýllın atyndaǵy Qazaq agrotehnıkalyq ýnıversıtetinde tanymal qazaqstandyq sýretshilerdiń sýret galereıasynyń saltanatty ashylýy ótti, dep habarlaıdy QazAqparat.

Joǵary oqý ornynyń óner jáne shyǵarmashylyq fakýltetiniń dekany, QR eńbek sińirgen ártisi, professor Bekbolat Baısaǵatov Jeke kollektsııasynan 20-dan astam kartınany ýnıversıtetke syıǵa tartty.

QR Parlamenti Senatynyń depýtaty Aqylbek Kúrishbaev QazATÝ-dyń Óner jáne shyǵarmashylyq fakýltetinde sýret galereıasyn saltanatty túrde ashyp, qyzyl lentany qıdy.

Galereıada klassıkalyq jáne qazirgi zamanǵy ónerdiń sýretteri qoıylǵan, olar bolashaqta tolyqtyrylatyn bolady.

«Bekbolat Baısaǵatovtan 2000 jyldary ónerdiń qalaı damyǵanyn kórsetetin keremet kollektsııa jınaldy. Olar: Asqar Sársenbekov, Senbiǵalı Smaǵulov, Alpysbaı Qazǵulov, Májıt Baıtenovtiń jumystary. Munda barlyq kartına realızm stılinde emes. Abstraktili, stıldik jumystar bar, olar da qyzyqty. Meni sımvolmen beınelengen fılosofııalyq shyǵarmalar qyzyqtyrady. Bul - Senbiǵalı Smaǵulovtyń eńbegi, onda rýlyq belgiler bar. Munda qoıylǵan kez kelgen sýretshi týraly uzaq aıtýǵa bolady, olardyń bári nazar aýdarýǵa laıyq», - dedi ónertanýshy N.V. Shıvrına.

Ashylý saltanatyna Nur-Sultan qalasynyń Sýretshiler odaǵynyń tóraǵasy Ómiráli Ismaılov, sýretshiler Kamıl Mýllashev, Sharhan Qazyǵulov, Senbiǵalı Smaǵulov, Asqar Sársenbekov, Baqytjan Áripov, Gúlmıra Telǵozıeva, ónertanýshy N.V. Shıvrına, fakýltet dekandary, oqytýshylar jáne t. b. qatysty.

Sondaı-aq qonaqtarǵa ýnıversıtettiń «Shabyt» halyq aspaptar orkestri men vokalısteri óner kórsetti.