QazATÝ-da sońǵy 40 jylda alǵash ret stýdentter jataqxanasy ashyldy
ASTANA. QazAqparat - Búgin Sáken Seıfýllın atyndaǵy Qazaq agrotexnıkalyq ýnıversıtetiniń jańa jataqxanasy - Stýdentter úıi paıdalanýǵa berildi, dep xabarlaıdy QazAqparat tilshisi.
Jańa ǵımarat 592 jatyn orynǵa qarastyrylǵan. Budan bólek, 9 qabatty Stýdentter úıinde jastar ortalyǵy, kitapxana, dárigerlik beket, asxana, sport zaly, shaxmat pen toǵyzqumalaq oınaıtyn jer, tipti kir jýatyn bólme de bar. «Byltyr biz jas mamandarǵa, magıstranttar men doktoranttarǵa Esil ózeniniń sol jaǵalaýynda 120 páterli úsh úı paıdalanýǵa bergen bolatynbyz. Sóıtip, barlyq oqytýshylardy jataqxanamen qamtamasyz ettik. Búgin Stýdentter úıin ashyp otyrmyz. Shyny kerek, ýnıversıtettiń stýdentter jataqxanasy sońǵy 40 jylda alǵash ashylyp otyr. Osynyń arqasynda stýdent jastardy jataqxanamen qamtamasyz etý kórsetkishi 75 paıyzǵa jetti. Bul barlyq joǵary oqý oryndary boıynsha eń úzdik kórsetkishterdiń biri bolyp sanalady», - deıdi ýnıversıtet rektory Aqylbek Kúrishbaev.
Saltanatty shara barysynda bilim jáne ǵylym vıtse-mınıstri Elmıra Suxanberdıeva jataqxananyń sımvoldyq kiltin ýnıversıtet stýdentterine tabystady. Stýdentter bolsa, óz alǵystaryn jetkizdi.
