QazATÝ-da saıası qýǵyn-súrgin qurbandaryna arnalyp quran oqytylyp, as berildi
"Keńes odaǵynyń quramynda bolǵan respýblıkalardyń ishinde dál qazaqtaı qýǵyn kórgen, qazaqtaı azap shekken birde bir ult joq. Qazaqstanda 100 myńnan astam adam stalındik qýǵyn-súrginge ushyrap, onyń 25 myńnan astamy jazyqsyz atý jazasyna kesildi. Táýelsizdik alǵaly tarıh qaıta paraqtalyp, sol zamanǵa saıası baǵa berilýde. Arystardyń aıaýly esimderi aqtalyp, ardaqtala bastady", - dep atap ótti "S. Seıfýllın atyndaǵy Qazaq agro-tehnıkalyq ýnıversıteti" AQ basqarma tóraǵasynyń birinshi orynbasary Aıtjan Ábdirov.
Onyń aıtýynsha, bıyl Alash arysy Sáke Seıfýllınniń týǵanyna 120 jyl tolýyna baılanysty oqý ordasynda kóptegen is-sharalar ótýde. Aıta keteıik, shara barysynda S. Seıfýllınniń ómirine arnap jazylǵan "Jolaıyryq" dramasynyń tusaýy kesildi. Qoıylymnyń avtory Qazaqstan Jazýshylar odaǵynyń múshesi, aqyn Ǵazız Eshtanaev bul týyndysyn ýnıversıtettiń "Aq jelken" stýdentter teatryna arnaıy jazypty. Qoıylymnan keıin qýǵyn-súrgin qurbandarynyń rýhyna arnalyp quran oqylyp, as berildi.
