QazATÝ-da Naýryz meıramyna oraı jýrnalıster men stýdentter arasynda ulttyq oıyndar spartakıadasy ótedi
ASTANA. QazAqparat - Ulystyń Uly kúni Naýryz meıramy qarsańynda, ıaǵnı 19 naýryzda S.Seıfýllın atyndaǵy QazATÝ-dyń sport zalynda «Asyǵyń alshysynan tússin» atty stýdentter men jýrnalıster arasyndaǵy respýblıkalyq ulttyq oıyndar spartakıadasy ótedi. Bul týraly oqý ordasynyń baspasóz qyzmetinen habarlady.
Sharanyń maqsaty - umyt bolyp bara jatqan qazaqtyń ultyq oıyndaryn nasıhattaý jáne olarǵa buqaralyq sıpat berý, deıdi uıymdastyrýshylar.
Spartakıada barysynda qazaqtyń ulttyq sport oıyndarynyń láńgi, asyq atý, jamby atý, qazaqsha kúres, arqan tartý jáne toǵyzqumalaq tárizdi túrlerinen jarys bolady. Asqan sheberlik pen aıaqtyń eptiligin qajet etetin «láńgi» oıynyn jańǵyrtý maqsatynda jýrnalıster men stýdentter komandalary arasynda bul oıynnan erekshe jarys ótedi.
Uıymdastyrýshylardyń málimetinshe, búgingi tańda 4 komanda tirkeýden ótti. Spartakıada sharty boıynsha, bir komanda quramynda bes oıynshydan bolady. Komandalar daıyndyq jumystaryn júrgizgisi kelgen jaǵdaıda ýnıversıtettiń sporttyq zalyn paıdalaný múmkindigi beriledi. Esterińizge sala keteıik, respýblıkalyq láńgi tebý saıysyna ótken 2013 jyly qatysqan toptardyń quramynda «QazAqparat», «Qazaq Radıosy», www.baq.kz, «Halyq sózi», «Nur Astana», «Astana aqshamy», «KTK» telearnasy, «7 arna», «QazATÝ qyrandary» komandasy t.b. qatysqan bolatyn.
Aıta ketý kerek, sharany S.Seıfýllın atyndaǵy QazATÝ, «Abyroı» qazaq tili men mádenıetin damytý korporatıvtik qory jáne «Alash amanaty» qoǵamdyq birlestigi uıymdastyryp otyr.
