QazATÝ-da elimiz joǵary oqý oryndarynyń tárbıe jumystary jónindegi prorektorlarynyń qatysýymen semınar-keńes ótti
ASTANA. Jeltoqsannyń 22-si. QazAqparat /Gúlmıra Álıakparova/ - Elimizdiń joǵary oqý oryndarynda jastardy tárbıeleý saıasaty QR Prezıdentiniń Ákimshiligi aıqyndap bergen bes basymdyqty baǵyt boıynsha júzege asyrylyp otyr. Bul týraly búgin Astanadaǵy S.Seıfýllın atyndaǵy Qazaq agrotehnıkalyq ýnıversıtetinde «Tárbıe tujyrymdamasy: úılestirý, júzege asyrý jáne damý bolashaǵy» taqyrybynda ótken respýblıkalyq semınar-keńeste oqý ornynyń rektory Aıtbaı Bulashev aıtty,
dep habarlaıdy QazAqparat.
A.Bulashevtyń atap kórsetkenindeı, 2008 jyldyń qyrkúıeginde QR Prezıdenti Ákimshiligi elimizdiń joǵary oqý oryndary rektorlarymen keńes ótkizip, onda elimizdiń joǵary mektepterindegi jastar tárbıesi saıasatyn kúsheıtýge baǵyttalǵan bes basymdyqty baǵytty aıqyndap berdi. «Búgingi kúni elimizdiń joǵary oqý oryndary ózderiniń tárbıelik baǵdarlamalaryn osy basymdyqtar negizinde daıyndap, olardy júzege asyrý jumysyna kirisip te ketti», - dep atap ótti ol.
Aıta keteıik, bes basymdyqty baǵytqa - jastar arasyndaǵy ultaralyq kelisimdi nyǵaıtý, dástúrli emes dinı aǵymdar men búldirýshi ıdeologııalarǵa ımmýnıtetti qalyptastyrý, stýdentterdiń jaǵymdy qundylyqtarynyń júıesin qalyptastyrý, quqyqtyq tártip buzýshylyqtyń aldyn alý problemalaryna jete mán berý jáne qoǵamdyq-saıası saýattylyqty arttyrý jatady.
Sondaı-aq ol, S.Seıfýllın atyndaǵy QazATÝ elordadaǵy alǵashqy joǵary oqý orny ekendigin jáne ol óziniń 50 jyldan astam tarıhynda 50 myńnan astam túlekke ómirge joldama bergendigin atap ótti. «Bizdiń ýnıversıtetke professorlyq-oqytýshylyq quramnyń turaqtylyǵy, urpaqtar sabaqtastyǵy men bilim sapasyna degen jaýapkershilikter tán. Eń bastysy, tulǵanyń jan-jaqty qalyptasýyna qolaıly jaǵdaılar jasap otyrǵan tárbıelik úrdisterimizdi erekshe atap ótken jón», - dedi rektor.
Respýblıka joǵary oqý oryndarynyń tárbıe jumystary jónindegi prorektorlary, QR Bilim jáne ǵylym mınıstrliginiń jáne orta arnaýly oqý oryndary ókilderiniń qatysýymen ótken semınar-keńes barysynda, sondaı-aq elordalyq QazATÝ-dyń Tárbıe jumysy jáne áleýmettik máseleler jónindegi prorektory Aleksandr Maıerdiń ýnıversıtet stýdentteri arasynda ótkizilgen «Oqytýshy stýdentter kózimen» jáne «Tamaqtanýyń qalaı, stýdent?» saýalnamalarynyń nátıjelerine arnalǵan baıandamasy tyńdaldy.
