«Qazatomprom» kompanııasynda aptasyna 400 myń jalaqy alýǵa bolady — feık

ASTANA. KAZINFORM — Ǵalamtorda «Qazatomónerkásip» ulttyq atom kompanııasy atynan tez ári ońaı tabys tabý týraly jalǵan aqparat tarady. Aıtýlarynsha, qazaqstandyqtar jasyna qaraı aptasyna 400 myń teńgeden tabys taba alady. Bul jalǵan aqparat, dep jazdy Stopfake.kz. 

Jelige jalǵan aqparat taratqan qaskóıler tek mátinmen shektelgen joq. Olar belgili qazaqstandyq saıasattanýshy Sanjar Boqaev ulttyq kompanııanyń baǵdarlamasy týraly aıtyp jatqan vıdeony montajdaǵan. Dybysy jalǵan. Vıdeoǵa negiz retinde Sanjar Boqaevtyń TikTok jelisindegi resmı paraqshasyndaǵy beıneni alǵan.

Aqpan aıynda jarııalanǵan vıdeoda ol respýblıka halqynyń qaryz aýyrtpalyǵyn talqylaıdy. Alaıaqtar qajetti fragmentti kesip alyp, jalǵan daýys qosqan.

«Qazatomónerkásip» UAK» AQ resmı saıtynda da, Instagram jáne Facebook áleýmettik jelilerindegi kompanııanyń paraqshalarynda da aptasyna 400 myń teńgeden túsetin tabys týraly habarlamalar joq.

— Jarnamadaǵy alaıaqtar qandaı tólem qajet ekenin bilý úshin siltemelerge ótýdi usynady. Eger aqshańyzdan aıyrylyǵyńyz kelmese, bul áreketke barmańyz. Joǵary tabysty jobalarǵa qatysty kez kelgen aqparatty synı turǵydan baǵalap, tek kompanııalardyń resmı veb-saıttaryna jáne olardyń áleýmettik jelilerdegi akkaýnttaryna kirgen jón, — delingen habarlamada.

Buǵan deıin habarlanǵandaı, elimizde dıpfeıkter úshin qylmystyq jaýapkershilik engizilýi múmkin.