Qazatomónerkásip ýran satýǵa qatysty eki iri mámile jasamaq
ASTANA. KAZINFORM — «Qazatomónerkásip» UAK» AQ aktsıonerleriniń kezekten tys jalpy jınalysynda tabıǵı ýrandy satýǵa qatysty eki iri mámile jáne kompanııanyń dırektorlar keńesiniń quramyn ózgertý máselesi qaralady.
Mámilelerdiń birin Qazatomónerkásip qytaılyq State Nuclear Uranium Resource Development Company Limited (SNURDC) kompanııasymen jasamaq. Kelisim tabıǵı ýran kontsentratyn U3O8 túrinde Qytaıdaǵy Alashankoý temirjol stantsııasyna jetkizýdi kózdeıdi.
SNURDC — State Power Investment Corporation Limited (SPIC) kompanııasynyń enshiles uıymy. Ol SPIC úshin ýran men jylý bóletin jınaqtar jetkizýge jaýap beredi. Sondaı-aq kompanııa Qytaıdyń tabıǵı ýran kontsentratyn ımporttaýǵa arnalǵan memlekettik lıtsenzııasyna ıe.
Qazatomónerkásiptiń habarlaýynsha, qazaqstandyq kompanııanyń kommertsııalyq usynysyn SNURDC qabyldaǵan. Osydan keıin taraptar ýran kontsentratyn spottyq satyp alý-satý shartynyń jobasyn kelisken.
Bul rette jetkizý kólemi, merzimi men mámile baǵasy jarııalanbaıdy. Qazatomónerkásip bul aqparattyń qupııa bolyp sanalatynyn jáne kommertsııalyq qupııaǵa jatatynyn túsindirdi. Kompanııanyń málimetinshe, mámile parametrleri naryqtyq jaǵdaıǵa jáne ýran naryǵyndaǵy qazirgi úrdisterge sáıkes keledi.
Ekinshi iri mámile tabıǵı ýrandy U3O8 túrinde «Ýranıým Ýan Grýp» AQ-na satýdy jáne ony Reseıdegi «Sibir hımııa kombınaty» AQ-ǵa jetkizýdi kózdeıdi.
«Ýranıým Ýan Grýp» «Rosatom» memlekettik korporatsııasynyń basqarý júıesine kiredi jáne reseılik korporatsııanyń sheteldegi ýran óndirý aktıvteriniń iri operatorlarynyń biri sanalady. Kompanııa sondaı-aq Qazatomónerkásiptiń birlesken kásiporyndarynyń qatysýshysy ári aktsıoneri bolyp esepteledi.
Taraptar ýran jetkizý týraly kelisimshart jobasyn kelisken. Qytaılyq kompanııamen jasalatyn mámile sekildi, munda da baǵa, jetkizý kólemi men merzimi kommertsııalyq aqparattyń qupııalylyǵyna baılanysty jarııalanbaıdy. Qazatomónerkásip mámile parametrleri naryqtyq jaǵdaıǵa sáıkes keletinin atap ótti.
Qazatomónerkásip dırektorlar keńesindegi «Samuryq-Qazyna» ókilin aýystyrýdy usyndy
Aktsıonerlerdiń kezekten tys jalpy jınalysynyń kún tártibindegi taǵy bir másele — Qazatomónerkásip dırektorlar keńesiniń quramyn ózgertý.
«Qazatomónerkásip» UAK» AQ dırektorlar keńesiniń múshesi, «Samuryq-Qazyna» AQ múddesin bildiretin Eljas Otynshıevtyń «Qazaqstan temir joly» UK» AQ basqarma tóraǵasy qyzmetine taǵaıyndalýyna baılanysty onyń kompanııa dırektorlar keńesiniń múshesi retindegi ókilettigin merziminen buryn toqtatý qajettiligi týyndaǵan.
Kompanııanyń iri aktsıoneri «Samuryq-Qazyna» AQ-nyń bastamasymen jınalys qaraýyna Otynyshevtyń dırektorlar keńesiniń múshesi retindegi ókiletin merziminen buryn toqtatý máselesi shyǵaryldy.
Onyń ornyna qazirgi ýaqytta «Samuryq-Qazyna» AQ-da strategııa jáne aktıvterdi basqarý jónindegi birlesken basqarýshy dırektor qyzmetin atqaratyn Jandos Qaıyrgeldi usynylyp otyr.
Osy úsh máseleniń barlyǵy «Qazatomónerkásip» UAK» AQ aktsıonerleriniń kezekten tys jalpy jınalysynda qaralady.
Eske salaıyq, buǵan deıin Qazatomónerkásip Aqdala ýranyn ıgerý merzimin 2030 jylǵa deıin uzartatynyn habarlaǵanbyz.
