Qazatomónerkásip halyqtyń ómir sapasyn arttyrýǵa baǵyttalǵan jobalardy júzege asyryp jatyr
ASTANA. KAZINFORM — «Qazatomónerkásip» UAK» AQ jáne «Semizbaı-U» JShS birlesken kásipornyndaǵy seriktesi — CGN Mining Company Limited kompanııasy Aqmola oblysynyń Birjan sal aýdanynda áleýmettik mańyzy bar jobalardy júzege asyrýǵa shamamen 1,2 mlrd teńge bóldi.
Qarajat eldi mekenderdiń ınfraqurylymyn jańǵyrtýǵa, aýmaqtardy abattandyrýǵa jáne turǵyndarǵa qolaıly jaǵdaı jasaýǵa baǵyttalǵan. Jobalardyń negizgi bóligi Stepnıak qalasynda iske asyrylyp jatyr. Atap aıtqanda, aýmaǵy 25,5 myń sharshy metrden asatyn qalalyq saıabaq abattandyrylyp, 27 turǵyn úıdiń irgeles aýmaqtary retke keltirilip, uzyndyǵy 3,7 shaqyrym kóshe joldary jóndelýde. Sonymen qatar, jalpy aýdany 2,5 myń sharshy metr bolatyn eki kópfýnktsıonaldy balalar alańyn ornatý, memorıaldyq keshen men Birjan sal atyndaǵy aýdandyq mádenıet úıiniń qasbetin jóndeý josparlanǵan.
«Semizbaı-U» JShS — Aqmola oblysyndaǵy iri salyq tóleýshilerdiń biri. Kásiporyn óńirdiń áleýmettik-ekonomıkalyq damýyna turaqty úles qosyp keledi. Kompanııa qyzmetkerleriniń basym bóligi — Birjan sal aýdany men Stepnıak qalasynyń turǵyndary.
Qazatomónerkásiptiń áleýmettik ınfraqurylymdy damytýǵa qosqan úlesi ózge óńirlerde de jalǵasyp jatyr. Túrkistan qalasynda kompanııanyń qoldaýymen Woosong University Kazakhstan halyqaralyq IT-ýnıversıtetiniń jańa oqý ǵımaratynyń qurylysy bastaldy. Jalpy alańy 16,5 myń sharshy metr bolatyn nysan tórt qabatty úsh bloktan turady. Jobanyń smetalyq quny — 7,5 mlrd teńge. Qurylysty 2027 jylǵy jańa oqý jylyna deıin aıaqtaý josparlanǵan. Joba zamanaýı bilim berý ınfraqurylymyn damytyp, eńbek naryǵynda suranysqa ıe mamandar daıarlaýǵa baǵyttalǵan.
Qyzylorda oblysynda da áleýmettik mańyzy bar jobalar júzege asyrylyp jatyr. 2026–2027 jyldary Qazatomónerkásip jáne onyń enshiles ári táýeldi uıymdary úsh nysannyń qurylysyna 2,1 mlrd teńgeden astam qarajat baǵyttady. Jańaqorǵan aýdanynda jańa emhana, Aqjol aýylynda 150 oryndyq klýb, Shıeli aýdanynyń Báıterek aýylynda sport kesheni boı kóteredi. Jobalar medıtsınalyq kómektiń qoljetimdiligin arttyrýǵa, jastardyń salaýatty ómir saltyn ustanýyna jáne bos ýaqytyn tıimdi uıymdastyrýǵa múmkindik beredi.
Atalǵan bastamalar Memleket basshysynyń áleýmettik jáne ınfraqurylymdyq nysandar salý jónindegi tapsyrmalaryna sáıkes, kompanııanyń qatysý óńirlerin damytýǵa baǵyttalǵan aýqymdy baǵdarlama aıasynda iske asyrylyp jatyr.
