QazAtomÓnerkásip Aqdala ýranyn ıgerý merzimin 2030 jylǵa deıin uzartpaqshy
ASTANA. KAZINFORM – «QazAtomÓnerkásip» ulttyq kompanııasy men Uranium One arasyndaǵy Aqdala ýran kenishin barlaý jáne ıgerý týraly 25 jylǵa eseptelgen kelisimshart aıaqtaldy.
Ulttyq kompanııa kenishtegi ıgerilmeı qalǵan 1,5 myń tonna ýrandy 2030 jylǵa deıin óńdeý úshin qujat merzimin uzartýǵa kúsh salyp jatyr.
Birden aıtý kerek, «QazAtomÓnerkásip» kompanııasy kelisimshartta kórsetilgen sharttar tolyq oryndalǵanyn aıtyp otyr. Alaıda kelisimsharttyń negizgi merzimi aıaqtalǵandyqtan 2026 jyldyń 28 naýryzynan bastap Aqdala ken ornyn paıdalaný quqyǵy toqtatylmaq.
Kelisimshart boıynsha Aqdala kenishi «Ońtústik Tórtqudyq–Qaraqum»» atty birlesken kásiporny arqyly barlanyp, ıgerildi. Bul kásiporynnyń 30%-y, «QazAtomÓnerkásiptiń», 70%-y Uranium One-nyń úlesinde boldy.
Memleket 28 naýryzda ken ornyn «QazAtomÓnerkásip» ulttyq kompanııasyna ýaqytsha senimgerlik basqarýǵa beredi. Óıtkeni kenish ıesiz qalsa, óndiris birden toqtaıdy. Al óndiris bir toqtasa, qaıta iske qosý úlken shyǵyndy qajet etedi. Onyń ústine jobaǵa tartylǵan mamandar jan-jaqqa tarap ketýi múmkin. Kenishte ıgerilmegen ýrannyń qory shamamen 1,5 myń tonna degen esep bar.
Óńirdegi áleýmettik teńgerimdi, kenishtegi jumys oryndaryn saqtaý úshin joba 2030 jylǵa deıin jumys istep turǵany kerek. «QazAtomÓnerkásip» sol úshin Aqdala ken ornyn 2030 jylǵa deıin ıgerýge múmkindik beretin jańa kelisimshart jasaýǵa múddeli.
— Kompanııa óndiristik áleýetti saqtaý jáne jumys uzaqtyǵyn qamtamasyz etý maqsatynda Aqdala ken orny boıynsha jer qoınaýyn paıdalanýǵa jańa kelisimshart alý múmkindigin qarastyrýda. Bul rette kelisimsharttyń qoldanylý merzimi ishinde jer qoınaýyn paıdalanýshynyń aldynda bekitilgen sharttar tolyq kólemde oryndalǵanyn atap ótý mańyzdy. Osylaısha, «OTHK» BK» JShS-niń atalǵan kelisimshart boıynsha jer qoınaýyn paıdalanýshy retindegi quqyqtary tolyq saqtaldy, — dep jazylǵan ulttyq kompanııanyń 2025 jylǵy operatsııalyq nátıjeleri týraly resmı málimetinde.
Aıta ketý kerek, Aqdala ýran kenishi Túrkistan oblysynyń aýmaǵynda jatyr.
«QazAtomÓnerkásiptiń» 2024 jylǵy esebinde «Ońtústik Tórtqudyq–Qaraqum» birlesken kásipornyna tıesili Aqdala men Inkaı ken oryndarynda 879 adam jumys isteıtini aıtylǵan edi.
Eske salsaq, «Samuryq-Qazyna» qorynyń qoǵamdyq keńes otyrysynda «QazAtomÓnerkásip» ulttyq atom kompanııasynyń tabysty jumysy neshe jylǵa sozylatyny týraly boljamdar talqylanǵan bolatyn.