«Qazatomónerkásiptiń» burynǵy vıtse prezıdenti R. Tursynbaev Kanadada úıqamaqqa alyndy
ASTANA. 26 maýsym. QazAqparat - «Qazatomónerkásiptiń» burynǵy vıtse-prezıdenti Rústem Tursynbaevty Kanada bıligi baqylaýǵa aldy.
Qazir ol úı jaǵdaıynda qamaýda otyr jáne endigi jerde ornalasqan jerin kórsetip otyratyn elektrondy baýdy taǵyp júrýge májbúr. Sondaı-aq ony táýlik boıy baqylap otyrady.
Eýrazııa birinshi arnasy «Ekspress K» basylymyna silteme jasap habarlaǵandaı, Rústem Tursynbaev «Qazatomónerkásiptiń» basyna bult úıirile bastaǵan shaqta, 2009 jyly Kanadaǵa kóship ketken bolatyn, al kompanııa prezıdenti Muhtar Jákishev qyzmet ornynan da, bas bostandyǵynan da aıyryldy. Burynǵy vıtse-prezıdentke memleketaralyq izdeý jarııalanǵan bolatyn. Oǵan 20 mıllıon dollardy qymqyrdy degen aıyp pen basqa da qylmystar tańyldy.
Kanadada Tursynbaevtar otbasy 3,6 mıllıon dollar turatyn keń úıge jaıǵasqan. Sondaı-aq kanadalyq Shekara qyzmeti erli-zaıyptylarǵa áldebireýdiń 48 mıllıon dollar aýdarǵanyn anyqtaıdy. Mundaı qomaqty qarajat jergilikti quqyq qorǵaý organdarynyń nazaryna ilikken. Sebebi memleketke kirerde Tursynbaev bar bolǵany 41 myń dollarynyń bar ekendigin aıtqan.
Sot isinde basty aıyptaýshy Shekara qyzmetiniń agenttigi boldy, ol Rústem Tursynbaevqa qatysty birqatar shekteýlerdiń engizilýine qol jetkizgen. «Qazatompromnyń» burynǵy vıtse-prezıdentine dárigerler men zańgerlerden basqa eshkimdi kirgizbeıdi. Kanada bıligi sonymen qatar úıdiń aýlasyna abaısyzda tikushaq qonyp, tutqyndy belgisiz baǵytta alyp ketpeýi úshin de sharalar qabyldaýda. Aıyptalýshynyń qarjy resýrstaryn eskersek, ondaı jaǵdaıdyń oryn alýy da ábden múmkin.
Tursynbaevtyń úıin táýlik boıy qaýipsizdik qyzmetiniń qyzmetkerleri baqylaýǵa alǵan. Beınebaqylaý da ornatylǵan. Aıyptalýshynyń úıindegi barlyq telefondar sóndirilgen, Shekara qyzmeti agenttigi baqylaý júrgizip otyrǵan bir ǵana apparat jumys isteıdi. Sondaı-aq Tursynbaev óz úıine shekarashylar men polıtseılerdi táýliktiń kez kelgen ýaqytynda kirgizip, talap etken qujattarynyń barlyǵyn kórsetýge mindetti.
Aıta keteıik, Rústem Tursynbaevtyń qorǵaýshylary bolyp jatqan oqıǵalardyń aqylǵa syıymsyz ekenin jáne kanadalyq bılik ókilderi onyń Qazaqstanǵa ekstradıtsııalanýyn kózdep otyrǵanyn aıtady.
