"Qazatomónerkásip" Ulttyq atom kompanııasy ulttyq sapanyń asa joǵarylyǵyn dáleldeıtin naǵyz brendtiń ózi – respýblıkalyq basylymdarǵa sholý

***

«Egemen Qazaqstan» basylymynyń jazýynsha, ústimizdegi jyldyń qańtar-qyrkúıek aılarynda elimizdegi ınflıatsııa deńgeıi 5,2 paıyz boldy. Osy merzimde ónerkásip óniminiń kólemi ótken jyldyń sáıkes kezeńimen salystyrǵanda 10,4 paıyzǵa artty. Sondaı-aq ónerkásip, aýyl sharýashylyǵy, saýda, qurylys, kólik jáne baılanys salalarynyń damý dınamıkasyn sıpattaıtyn qysqa merzimdi ekonomıkalyq ındıkator ótken jyldyń sáıkes kezeńimen salystyrǵanda 8 paıyzǵa ósken. Premer-Mınıstr Kárim Másimovtiń tóraǵalyǵymen ótken el ekonomıkasynyń jyl basynan bergi jetistikteri men problemalary jóninde «El ekonomıkasynyń ósimi-8 paıyz» atty maqalda.

***

«Aıqyn» basylymynyń jazýynsha, keshe ǵana elimizde ótken qazaqstan-koreı bıznes-forýmynda eldiń ındýstrııalyq-ınnovatsııalyq baǵdarlamasynyń damýyna tyń serpin beretin birqatar qujattarǵa qol qoıyldy. Indýstrııa jáne jańa tehnologııalar mınıstri Áset Isekeshovtyń aıtýynsha, buǵan deıin Koreıamen birlesip qolǵa alynǵan jobalar oıdaǵydaı júzege asyrylyp keledi. Mysaly Koreıanyń «Ssang Yong Motors Corporation» kompanııasy Qazaqstanda avtomobılder kompanııasymen birlese otyryp, rásimdelgen kelisimniń aıasynda jyldyń sońyna deıin 300 avtokólik shyǵarmaq. Osyǵan deıin shyǵarylǵan 72 kólik arnaıy synaqtan ótip jatyr.

Kelesi jyly mundaı kólikter sany 1 myńǵa, al arǵy jyly 3 myńǵa jetkizilmek. Bıznes-forým barysynda kóterilgen osy jáne ózge de máseleler jóninde «Aıqynnyń» búgingi sanyndaǵy «Qazaqstannyń talabyn qýana qabyldady» atty maqalada.

Sondaı-aq atalmysh basylymǵa suhbat bergen Sırek metaldar jáne geologııa ǵylymdarynyń doktory Baqytjan Erbolovtyń aıtýynsha, "Qazatomónerkásip" Ulttyq atom kompanııasy ulttyq sapanyń asa joǵarylyǵyn dáleldeıtin naǵyz brendtiń ózi. «Qazir dúnıe júziniń kóptegen memleketteri ıadrolyq energııa óndirisiniń qyr-syryn bilýge, meńgerýge qulshynyp jatyr. Olarynan ne shyǵatynyn ýaqyt kórseter. Al biraq kúni búginge deıin ıadrolyq energııany paıdalanýǵa deıingi tizbekti tolyq ıgergen memleketter dúnıejúzinde sanaýly-aq. Olar joǵaryda aıtqan bizdiń áriptesterimiz jáne bizdiń Qazaqstan. Minekeı, osyndaı sanaýly memlekettiń biri bolý ulttyq sapanyń naqty kórsetkishi emes pe?!», deıdi ǵalym. Bul másele jóninde «Aıqynnyń» búgingi sanyndaǵy «Astana sammıti - beıbit damý baǵytyndaǵy ulttyq samǵaýdyń kezekti satysy» atty suhbattan maǵlumat alasyzdar.

***

«Almatyda Alash arystarynyń atymen atalatyn saıabaq pen Aqyndar alleıasyn ashý ıdeıasy armanǵa aınalǵaly qashan?! Osy usynystardy qaıta-qaıta aıtýdan jalyqpaıtyn qazaq basylymdary men zııaly qaýymnan joǵarydaǵylar ábden mezi bolǵan shyǵar...», dep jazady «Alash aınasy» basylymynyń tilshileri. Olar taratqan málimetterge qaraǵanda, nege ekeni belgisiz, áıteýir qazaqqa qatysty dúnıelerge qoldaý kórsetýge kelgende resmı mekemeler syrǵaqtap ketedi. Esesine ózgelerdiń jylt etpesin odan saıyn jarqyratyp ala ketetin ózeýregish qasıetimiz bar. Bul joly da úırenshikti ádet boıynsha solaı boldy. Tarıhı tulǵalarymyz ben ult tulǵalaryn laıyqty ulyqtaı almaı júrgenimizde ótken aptada Jarokov pen Ótepov kósheleriniń qıylysyndaǵy «Ońtústik» saıabaǵynda áıgili brıtandyq «Bıtlz» tobynyń negezin qalaýshy, álemdik rok-juldyz Djon Lenon atynda alleıa ashyldy. Bul týraly «Alash aınasynyń» búgingi sanyndaǵy «Rok-juldyzǵa alleıa buıyrǵan Almatyda Alash arystarynyń saıabaǵy qashan ashylady?» atty maqalada.

Sondaı-aq atalmysh basylym elimizdiń ońtústik óńirinde oryn alǵan keleńsiz jaǵdaıǵa baılanysty dabyl qaǵypty. Basylym tilshileriniń habarlaýynsha, elimizde aýyz-sýǵa aıamaı aqsha bólinip jatqanymen aıqaı-shý áli azaımaı otyr. Aýyldyq jerlerdi bir mezgilde qamtý qıyn, al 800 myńnan astam halqy bar Shymkent pen oblys ortalyqtaryn jaqyn aýdandardaǵy shıelenisken máseleniń sheshimin tappaı otyrǵanyn qalaı túsinýge bolady?. Shymkenttiń aınalasyndaǵy aýyldarda aýyz sý problemasy kúrdeli kúıinde. Bul týraly basylymnyń búgingi sanyndaǵy «Aýyl taza sý, «Taza sý» aqsha suraıdy» atty maqalada.